WordPressoneg

Ur gerig hepken a-benn trugarekaat ar re a gendalc’h da sikour evit an droidigezh 🙂

M’emañ ho taolenn-labour e brezhoneg ganeoc’h ho peus merzet sur a-walc’h emañ hogos pep-tra e brezhoneg en-dro. Cheñchamant a oa bet, hag ur mare ‘zo ne oan ket bet d’ober war dro an treiñ. Ma, renket an traoù bremañ ! Chom a ra kalz traoù da ober, evel-just (un 10,000 troidigezh bennak, memestra), hogen mont a ra war-raok, tamm ha tamm !

Mar kavit fazioù, hag all, pe ma zo un dra a fellfe deoc’h gwelet e brezhoneg diouzhtu, lavarit din ; pe, gwelloc’h c’hoazh, kit d’e dreiñ hoc’h-unan ! Klikit amañ. Gellout a rit implij ar bouezell ‘Filter’ da gavout ar pezh a fell deoc’h treiñ, aes a-walc’h eo da c’houde. Ur wech troet tra-pe-dra ganeoc’h e vo kadarnaet ganin, ha setu !

N’eo ket ret deoc’h sikour, evel-just, n’eus ket amzer gant an holl. Hogen tu a zo deoc’h da vrudañ ar savenn e-touez ho mignoned, da lakaat muioc’h a dud da implij anezhi, ha da vlogiñ e brezhoneg. N’ouzon ket ma oar ar skolioù, ar c’hevredigezhioù, hag all, ez eus tu da ober kement-se e brezhoneg (hogos) penn-da-benn, met mat e vefe brudañ, d’am soñj.

Setu setu, ar vunutenn bruderezh e oa 😉

Awwwwwwwwww yeah!

Yessssssss, kentañ ! Haha, lavaret ‘m ‘oa deoc’h ! Pebezh stress spontus pa erruer d’an 3 anv diwezhañ… ha d’an 2 ziwezhañ ! (dreist-holl pa grog “Cap Caval” gant an hevelep son ha “Kemper”, brrrr) Daoust ma n’eo ket gwall jentil eo diaes mirout a huchal gant al levenez pa vez embannet an eil… Ha n’eo ket c’hwi !

Reizhoc’h e vefe, en ur mod, kregiñ gant an hini kentañ, ha mont tamm ha tamm betek an hini diwezhañ. Boñ, ne vefe ket kement a suspense, met stlakañ a rafe an dud o daouarn evit gwir, gant levenez evit ar stollad embannet, ha ket peogwir  e soñjont “ouf, n’eo ket me !”. War an tu all, evel-just, ne vefe klevet netra peogwir e vefe ar re gentañ oc’h huchal ha lammat e pep-lec’h xD

Haha, n’eo “nemet” ur genstrivadeg, met vat a ra 😀

D’an Oriant bremañ, da gaout un ugentvet titl a gampion Breizh (d.l.e. kampion ar bed, hehehe), youc’hoù !

Sarah

En tu all d’ar mor, en ur vro na welin ket,
Plac’h yaouank glas he daoulagad, fulenn gollet,
Evit lenn an nebeud gerioù-mañ ne vi ket
Koulskoude e fellfe din gellout da welet
O vousc’hoarzhin, evit ur wech, pa ne rez ket
War ar pemdez, priñsezig he buhez kalet,
Pe re ral a wech e vefe; ha trawalc’h n’eo ket
Evit diverkañ eus goueled da spered
Ar soñjoù du a ra din anken, ha n’on ket
Eus ar re zisoursi koulskoude, gwarezet;
Fellout a rae din lavar dit, lennet pe get,
Trugarez dit evit ma lakaat da gousket
Gant ur mousc’hoarzh me ivez, pa n’em eus ket.

Ur gerig hepken

Ya, disoñjet ‘m eus hetiñ un Nedeleg laouen deoc’h! Gant ar vezh. Ma, gant an tad-Nedeleg em eus bet ur sklentenn c’hrafek vihan (da welet ma plij din labourat gant seurt traoù, kent prenañ unan ‘pro’, a zo ker, memestra ^^), un dresadennig neuze, din da bleustriñ un tammig gant ar benveg nevez se ^^ (cf. an dresadenn ziwezhañ en notenn gent, ivez ^^)

Haha !

C-c-c-c-combo !

Trugarez dit, Chen, tizhet ar pal fenoz a-drugarez dit 😀 Ha trugarez d’an holl lennerien ivez, ha d’ar re a lez un evezhiadenn ur wech ar mare 😉 Daou c’hant notenn, memestra. Ma, traoù mat ha traoù fall, traoù dedennus (spi ‘m eus !) ha traoù ne oant ket (pe ket kement :D), traoù hir ha traoù berr, traoù laouenoc’h (ah ?) ha traoù digalonekaus (ya, dreist-holl :p), kalzig traoù a zo bet memestra ! Ha chom a ra traoù am boa lavaret a rafen ha n’em eus ket bet tro da ober c’hoazh… A vezo graet en dazont ! N’ouzen ket re vat ma talc’hfen gwall bell gant ar blog-mañ, hogen talvezout a ra ar boan, d’am soñj, evit ar blijadur da lenn hoc’h evezhiadennoù tra ken ! Hag evit gellout paboriñ gant notennoù evel homañ, ivez :p

Traoù zo o deus cheñchet em buhez abaoe m’am eus bet roget d’e skrivañ, ivez, daoust m’eo bet un doare da bareañ aboae ar penn-kentañ anezhañ, ha m kendalc’h da vezañ. Iskisat tra e vefen bet dic’houest da zerc’hel da skrivañ pa oan em fallañ un nebeud sizhunvezhioù ‘zo. Chal ha dichal n awen hag ar c’hoant, emichañs. Ma, sklaeroc’h ar c’houmoul bremañ, sklaeroc’h ivez sked an heol, ha daoust m’o defe touet doueed an Etrerouedad hegasiñ ac’hanon betek penn e tlefemp en em dennañ ! Ur banne stlennsistr a brofan d’an holl, ha chom a ra cheesecake evit ar re a fell dezho, aze, war an daol. N’eus ket whisky ken, siwazh ^^

Trugarez deoc’h ur wezh ouzhpenn, tudoù, ha gant ma kendalc’ho an niveroù-se da vont war gresk; ul levrig a vil pajennad n’eo ket c’hoazh 😉

Interwebz, fuck yeah!

Oh, traoù ‘zo a zo re vat, kaaalz re vat da chom hep bezañ lakaet amañ xD

Evel just e c’heller ober lod e brezhoneg ivez, hañ, daoust ma vefe farsusoc’h ar meme-où e saozneg peurliesañ 😉

Boh, ya, aes eo ^^ Met soñjet ‘m eus e c’hellfen ober un tamm notenn bennak hep klemm, evit ur wech (daoust ma vefe diaes, bremañ ma ‘z eus bet komz eus Emglev Brein, hahaha), peogwir ne ya ket ar bed ken fall se, e gwirionez. Ya, kudennoù zo e pep lec’h, gant an holl, evit an dazont, evit ar yezh, war ar pemdez hag en ideologiezhioù a vez taolet deomp, met daout ha ken pouezus-se eo ? Pa oamp, un nebeud mignoned, brezhonegerien, o farsal ha pakañ banneoù, ne oa ket gwall bouezus ar bed en diavaez, ha gellout a raemp c’hoarzhin a bep-tra. Mareoù zo ‘giz ar re-se, ha pa vefemp gant un enkadenn ha ma vefe teñval ar c’houmoul war dremmwel hon dazont, paour-kaezh studierien ma ‘z omp c’hoazh (opala, trouz a oa en AG hiziv…), bez zo mareoù ‘giz-se ma ne reer ket van.

N’eo ket du pep-tra, dre eurvat, hag e-kreiz an noz e vez ur sklerijenn bepred. Na !

3-3

The sad song in my head
Is spinning, is spinning
Ensnaring, silken thread
It’s soft grip tightening

Ne vez ket heñvel-poch
Ar sonioù, ar gerioù
Oc’h harzal en o loch
Divergont o zrouzioù

Golden words I loved then
Caressing and healing
I’ll never hear again
Devoid of suffering

Galloud glann ar vouezh noazh
Trivliadoù, arlivioù
Pa n’eo fall e vez gwazh
Andon hesk ma soñjoù

When you have nothing left
To live for but memoirs
Diamond chips, minor theft
From your past roman noir

Ne chom mui en ho penn
Tarzh an deiz da serr-noz
Nemet ar ganaouenn
Ho lazho, poz ha poz

Ding !

Ya, torr-revr on gant ma sifroù, met ding ding ding ! 100 notenn ! Aha, vat a ra. Daoust ma seblant din emaon en ur mare kleuz un tammig dre ma ne ran ket kalz a dra war-bouez skrivañ eztaoladennoù ha n’am eus ket kalz a dra da gontañ ez on laouen da vezañ tizhet ar bon-se 😀 Laouen dreist-holl peogwir e talc’han da vont hag e kavan se plijus. En em santout a ran un tammig evel e rehab’, e digontammiñ, oc’h adkavout plijadurioù ar pemdez hag o welet e c’hellan ober traoù, talvoudus pe get. Ha vat a ra. Hop hop, dalc’homp da vont !

Siwazh n’am eus ket bet amzer da brientiñ tra pe dra a-ratozh; fellout a ra un tamm gwastell deoc’h ? Graet vo unan deoc’h. Ur banne punch ? Ma, graet vo unan ivez, mar fell deoc’h. N’oc’h ket deuet da evañ hepken, spi ‘m eus ? Marteze e chom un dakennig wiski, gortozit. Ah, ya, aze ‘mañ. Piv ‘n do ur bannig ? MacAllan, 12 vloaz. Plijout a ra din kalz, anat deoc’h, gant un anv ‘giz se n’eus ket da dortañ ^^ Mmmmh ? Ya, n’eo ket fall ar punch met n’on ket paotr ar rom, ma lakaat a ra klañv, met evit ‘ta, evit, arabat ‘chomfe anezhañ ! Lakaet e vo Nadine d’ober un cheesecake deoc’h e-keit m’emañ ar wastell avaloù o poazañ, ha chom a ra brownies eus derc’h da noz. Ya, da noz e reomp gwastilli bepred, kit da gompren perak !

Nann, n’eo ket gwall vrav ar voketenn aze, gouzout a ran, ar bleunioù flashy war foñs du… Hag ar gourvez-vank… Met klet eo,hag ar c’hadorioù kement-all, daoust d’o liv ! Ma c’hambr ? Eeeee… ya, an nor er foñs du-hont. Ket an tu se, an tu all. Ya, setu. Met na yit ket ‘barzh, direnket eo ur spont. Ne soñje ket din e teufed, ha n’am eus graet nemet labourat enni e-pad ar sizhunvezh hanter ziwezhañ, paperachoù a zo o straniñ e-pep lec’h, levrioù ha geriadurioù war ar gwele, hini an Here war a Robert & Collins, ar Gleo en ur c’horn ivez gant ur geriadur saozneg unyezhek, loeroù lous war al leur… Ah, setu ma geriadur saozneg-iwerzhoneg. Ya, echu ar c’hentelioù pellig a-walc’h ‘zo bremañ. Ma, lezit an nor-se ha deuit amañ kentoc’h ! Ar privezioù ? Dres ‘kichen ma dor, an hini greiz. Setu, dres.

Eh, piv ‘n eus ur benveg luc’hskeudenniñ ? ‘M eus ket kemeret luc’hskeudennoù eus an ti zoken, tsss ! Hag evit ur wech ma ‘z omp holl asambles, ha gant ur benveg ! Pep-ep ! Deus amañ, an holl war ar skeudenn, sur on ez eus un daleer. Boñ, mat, met ur skeudenn all a vo graet ganit warni neuze. Eh, c’hoant am eus da gaout eñvorennoù ^^ Hag evel a lavaren un deiz all e c’hello bugale hon emsav deomp-ni ( petra vo graet anezhañ, an emsav sioulik ?) ober goap ouzhimp a-benn daou-ugent vloaz, pa vo brezhoneg e korn pep straed. Oh, mat eo, tu ‘zo da c’hoarzhin, n’eo ket dav distreiñ da Bejiach bepred. Lorc’hus pe get e kendalc’h ar marc’h da vont. Ur sapre marc’h-labour, ‘keta ?

Ah, prest ar wastell-avaloù, piv ‘n ‘o un tamm ? Reol-voued ? Peseurt reol-voued ? Moan out evel arguzennoù Sarko, moan evel geriaoueg Brud-Nevez ! Ale hop, un tamm, ha m’eus c’hoant klevet abeg ebet, netra, na bu na ba. Seeetu. Aha, soñj o peus eus an devezh kentañ ma oan erru amañ ? Ne oan sur eus netra, nag eus petra a rafen nag eus pegeit en grafen. Ha n’ouzon ket gwelloc’h hiziv ! Aha ! Dre chañs emaoc’h aze memestra, hag e vez tud o lenn. Pellig ‘zo n’oc’h eus lavaret netra, keit m’emaon ganti, ken dizedennus-se eo ? Mmmh, gwir eo n’eus ket kalz a dra da lavar pa gontan ma buhez ^^Meuh nann n’eo ket ur rebech, rhooo, n’eus ket tu da lavar e lakafen kalz evezhiadennoù er mare-mañ kennebeut.

Gouzout a rit e vo un doare abadenn pa vo roet an diplomoù iwerzhoneg ? Gant an dilhad hir hag an tog-studier amerikan, aze, c’hwi oar ? Oho, distreiñ a rin evit-se tra ken, piv n’en deus ket bet c’hoant bannañ e dog droch en avel ? Aha, fun e vo. Mmh ? E miz here war a seblant. Ya, mont a rin evit se hepken, sur ‘walc’h, emaon o paouez lavar se, evit an abadenn ha gwelet an dud kwa. Oh, plijus ‘vo d’am soñj. M’am eus an diplom, ‘vel just, met ne vo kudenn ‘bet sañset. Bah, nann, gwir eo, ne servij ket da galz tra, met farsus eo war ar seve, ha plijus evito gwelet estrenien dedennet, d’am soñj ! Ale, deoc’h c’hwi bremañ, n’ouzon ket ma vez graet ar memestra gant kembraeg… N’eo ket anveet evel yezh ofisiel en Europa, geo ? Ah… Dont a raio un deiz bennak ! Ha ni an deiz war-lerc’h, emichañs. Da c’hortoz n’omp ket en ul lec’h re fall e gwirionez. Kollet hon eus hogos pep tra hag emaomp oc’h adc’hounid tamm ha tamm… Diaes ‘vefe bezañ e stad falloc’h, neuze e yelo war wellaat. Ya, pa varvo ar re gozh e vo izel-izel an niver a dud. Met ne chomo nemet tud oc’h implij da vat, marteze. Gouzout hag implij… N’eo ket ar memestra, ‘keta ? Met trawalc’h gant se, n’oc’h ket deuet da vagañ soñjoù du. Petra nevez ganeoc’h ?

Un tamm gwastell all ?

Dramm

 

Hehe, trugarez tudoù ^^ Ur blijadur bepred lenn ar pezh hoc’h eus da lavar, eus ar berrañ smiley d’an hirañ soñj ! D’am soñj eo unan eus an abegoù ma vez savet blogoù gant an dud, evit ezteurel ar pezh a vez da lavar, ya, hogen evit resevout alioù ar re all  ivez, ha gwelet ez oc’h bet lennet. Hep an evezhiadennoù-se e vefe an holl destennoù a skrivan evel boutailhadoù bannet er mor, kollet ganin hep gouzout re vat da belec’h emaint aet; piv en deus o lennet ha petra o deus soñjet. 

Setu perak em eus aon un tammig rak embann, pe bezañ embannet kentoc’h. Pa oa evit Priz ar Yaouankiz e oa anat ar respont, ur genstrivadeg e oa, gouzout a rafen buan daoust ha plijet en doa ar skrid pe get ! N’eus ket tu da lavar e oan beuzet e morad al levrioù kinniget. Met aze ? E-touez ar c’hant (-mil :D) den a vo dedennet gant al levr, pet a zeuio da lavar din pegen null eo (pe pegen mat, hañ, alioù positivel n’int ket displijus ^^) ? Hep soñjoù ar re all hag o alioù ne ‘z eer ket war-raok, chom a reer da neuial a gelc’h en hevelep poull (ya, metaforennoù diwar-zour hiziv). Pa ne vez ket lavaret deoc’h ar pezh ne ya ket, penaos gwellaat ? Ha ma ne vez ket lavaret deoc’h petra a zo mat, penaos gouzout eo ret derc’hel ganto ? 

Marteze ez on me kablus un tammig, rak ne gredan ket reiñ ma soñj bepred, pe kemer amzer da skrivañ un draig pa lennan traoù dedennus, koulskoude e ouzan mat pegen plijus e c’hell bezañ sevel da vintin ha gwelet evezhiadennoù ouzh ma gortoz (me ur geek o lakaat e urzhiataer war-enaou a-boan savet ? me ? Tamm ebet, war-enaou e vez a-raok din sevel zoken :D). Bezañ diouzh an evezh a zo plijus, hag holl e fell deomp bezañ merzet, d’am soñj. Gwir eo e c’hell dont da vezañ un dramm un tammig, ha me da hizivaat ar bajenn meur a wech bemdez da welet ma zo traoù da lavar, war ar blog-mañ pe foromoù a gemeran perzh eno, pe me-oar-me. Gant internet hiziv an deiz eo kalz aesoc’h reiñ e soñj da viliadoù a dud, hag e c’heller kaout respontoù a bep lec’h hag a bep doare, ar pezh a ra e c’hell bezañ dedennus-spontus (pe ur brezel trolled, ivez). 

N’am eus biskoazh butunet an disterañ tra, ha ne evan ket kalz kennebeut (ma, ret eo din evañ kaaaaaaaaalz a-raok bezañ mezv, ha ne zegas ket efedoù gwall blijus da c’houde, neuze ne c’hoarvez ket alies ^^), lakaomp emañ aze ma dramm, ma si ^^ “Moran eo ma anv, ha suj on d’an evezhiadennoù”, an ED, Evezhiadennourien Dianv. Alala ! Arabat deoc’h en em santout rediet da lezel tra pe dra ma ne fell ket deoc’h (met ma ‘z eus nebeutoc’h eget 5 evezhiadenn war an notenn-mañ e yelo fall-tre an traoù ! ^^). D’am soñj emañ an efed-se abeg da ziorren al lec’hiennoù evel Facebook ha Twitter (ha, gwashoc’h c’hoazh, Foursquare), an ezhomm bezañ merzet ha kaout ur respont digant ar re all, etre gasterezh ha sellerezh. N’on ket d’ar poent ma vin maleürus ma n’eus evezhiadenn ebet, dre eurvat (!), ha n’am eus ket ezhomm diouto per se, met plijus eo, anzav a ran.

Ma, trawalc’h gant ma rambreal, trugarez deoc’h.

Ken a vo, eme Varbie

Hehe, gwelet ho peus ? 36 notenn e miz Meurzh ^^ War a seblant em eus dalc’het ganti pelloc’h eget na soñje din… Ma, trugarez deoc’h da vezañ deuet d’am lenn, ha da vezañ lezet evezhiadennoù a-bep seurt. Plijus eo bet evidon ha spi am eus eo bet plijus evidoc’h ivez. Desket am eus traoù, diwar-benn un aridennad dodennoù ha diwar ma fenn, ha gwir eo eo aesoc’h soñjal pa lakaer e soñjoù war baber a-wechoù.

Soñjal am eus bet graet diwar-benn ar yezh alies, hag e flas er bed kement hag em buhez, met biskoazh n’em boa bet ezhomm da frammañ ar soñjoù-se ha d’o displegañ da dud all. D’am soñj on deuet a-benn d’en ober memestra, ha laouen on bet o welet tud a-du ganin. Mall zo warnon distreiñ da Vreizh d’ho kwelet, ha da veskañ ma brezhoneg gant lod all (mmmh, iskisad skeudenn, Moran, dre chañs ne peus implijet ket tongue pe langue oO).

Ur blijadur eo bet da vat, hogen mont a ra an traoù mat da get ivez. N’em bo ket amzer ken da zont da doullañ kaoz re alies amañ, ha ne fell ket din e teufe ar blog-mañ da vezañ unan hizivaet ‘ur wech an amzer’ pe ‘an aliesañ posubl’ evel ar re all am eus graet. Gouzout a ran ez eus bet devezhioù ma n’am eus kroget da skrivañ nemet peogwir em boa prometet en ober. Ma ’em bije ket touet em befe soñjet “Ma ! ket fenoz… ur wech all”, ha ne vefe bet netra nevez e-pad sizhunvezhioù. Siwazh n’am eus ket ar youl da genderc’hel gant se re bell ken. Gwan on a-wechoù.

Gouzout a ran e c’ehllfen skrivañ un nebeud traoù c’hoazh a-raok bezañ beuzet gant al labour da vat (dre forzh daleañ…), hogen ne vefe netra dedennus (da lavaret eo e soñjez e oa dedennus da notennoù a-raok ? Quousque tandem abutere, Moran, patientia nostra ?), ha ma ne fell ket din en ober en grin fall. Pa vez al loen o vervel eo gwelloc’h e beurlazhañ a-wechoù kentoc’h eget e lezel da greviñ gorrek.

Kavout a ran gwelloc’h neuze lavar kenavo deoc’h, kentoc’h eget un hantergimiad leun a faoster ha promesaoù ken faos all. Kenderc’hel a rin gant troidigezh WordPress, evit ar re o do kalon da vont war raok ha da ledañ ar brezhoneg war an Etrerouedad. Ma fri tougn a vo gwelet war Wiki a-wechoù ivez sur-a-walc’h, ha war Facebook (DremmLevr, haha, pebez anv memestra ^^) evit ar re a zo mignon ganin warnañ. Dont a rin da lenn ar pezh a vo skrivet ganeoc’h war ho plog pe e lec’h all m’ho kavan (!), ha lezel ur gerig deoc’h, rak gouzout a ran e plij din gwelet ez eus bet lezet lod din.

Trugarez deoc’h holl neuze, ha digarez mil gwech. Spi am eus e c’hellin adkregiñ ur wech bennak, ha derc’hel ganti ar wech-se. Ur blijadur eo bet da vat, un abadenn zispar, ne soñje ket din e c’hellfe sevel ur blog ha skrivañ pennadoù berr bezañ ken fun, ken farsus ha ken mat evit ma ego dreistmentet (daoust ha dic’hwezet pe c’hwezhet brasoc’h eo ar c’hwezhigell ho lezan da zivizout). Gwelet a rin un darn ac’hanoc’h a-benn nebeut emichañs, ken ar c’hentañ neuze. Ha d’ar re na welin ket, kasit ur ger din, pe lezit unan amañ mar fell deoc’h, ho trugarekaat a ran  ivez.

Kenavo, tudoù, kenavo, levrig.

p.s: ya, pesk Ebrel evel-just, re a blijadur am eus amañ ^^