Hiziv e vo div

Ya, div notenn (evit priz unan !), rak fellout a ra din fougasiñ ha diskouezh ma babig deoc’h un tammig (emañ ma ego dreistmantet o c’hounez, war a seblant ^^). Evit poent ne oa tu da sevel ur blog e brezhoneg nemet gant Nireblog. Hag unan am boa klasket ober, ha me da soñjal ne oa ket gwall aes da implij (n’eo ket boureverezh kennebeut, hañ) ha ne blije ket re an droidigezh din (a zo komprennus, met Ofis 100% — ma digarezit, tud an Ofis, labour vat a vez graet ganeoc’h memestra). Hop hop, p’am eus savet ur blog amañ n’ouzen ket e oa tu da lakaat brezhoneg, soñjet am boa e lezfen e saozneg, ha gwazh a-se. P’am eus gwelet brezhoneg e listennad ar yezhoù a c’helled lakaat da yezh bennañ war ar blog on bet souezhet neuze, ha nebeud war-lerc’h em eus dizoloet e oa tu da dreiñ al lec’hienn ! Oooooh ! Plantet ‘barzh neuze, gant ar spi ober ul labour mat a-walc’h da zesachañ ar vrezhonegerien all. Diskouezomp deoc’h neuze.

Aet on da zizouarañ ma Nireblog, ha setu ar bajenn merañ (klikit war c’horre, na zistrujit ket ho taoulagaden ur glask lenn an destenn vunut-vunut):

 

Ha setu bremañ WordPress (ho taoulagad, memestra, klikit):

(me a wel un diforc’h…)

Hag ar bajenn sevel-notennoù, evit ar fun (for the cable, evel ma lavaront e saozneg (lakait ar son)):

 

Evel ma c’hellit gwelet eo un tamm-mat bravoc’h WordPress, daoust ma vefe Nireblog o vont en dro gant ur poellad WordPress, just a-walc’h. Reiñ a ra c’hoant ober traoù, me gav, ha kaout traoù flimm-flamm ‘giz se a zo mat evit ar yezh ivez (setu, plantet ur ‘mat evit ar yezh’, tu ‘zo din da vont bremañ !).

Un dra memestra: divizhet ‘m eus obet gant notenn hag evezhiadenn evit post ha comment peogwir ne vez kemmadur ebet warno, ar pezh a zo kalz aesoc’h evidon da dreiñ (dre ma vez an holl liesterioù en 1 droidigezh, n’heller ket ober sifr dre sifr: pajenn am eus graet gant b/f/pajenn, da skouer, ha n’eo ket brav tamm ‘bet, memestra evit d/z/tag)

N’eo ket echu an droidigezh, tamm ebet zoken (2030 string troet diwar 8220, tamm pe damm, da lavaret eo ur 25% bennak, o c’houzout eo graet ar pep gwelusañ memestra). Kudennoù a chom gant an araogennoù dre ma ne vez kenaroud ebet pa vez graet an droidigezh. ”At” pe ”on” (e saozneg, hañ) a c’hell talvezout meur a dra ^^, hogen reizhet ‘vo tamm ha tamm (eee, spi ‘m eus ^^). Me zo sur ez eus ur bern fazioù biskrivañ hag un ‘r’ pe ur ‘zh’  re pe a vank amañ hag aze. P’ho pezo kroget gant ur blog nevez goude bezañ bet kendrec’hiet gant ma fropaganda e c’hellot lavar din, pe mont da reizhañ oc’h unan !

Stlenneg

Pegen rouez ar brezhoneg war an Etrerouedad ! War-bouez wikipedia hag an nebeud lec’hiennoù ofisiel amañ hag aze eo ret anzav n’eus ket kalz a dra. Hag ar pezh a vez kavet a zo liv ar c’hozh warnañ alies (lec’hiennoù doare ar bloavezhioù ’90 -_-‘). N’eo ket aes ober traoù brav atav, dreist holl pa vez diouer a arc’hant. Diaes ivez ober kement a strivoù pa ouzer ne vo nement 4 den o tont bep miz (ha n’eo ket gwall zisheñvel war ar blog-mañ, gouzout a ran mat ^^). Ur sapre labour a zo bet graet, hag a vez graet c’hoazh, war Wikipedia (hag ar wikeriadur) memestra, muioc’h a bennadoù hon eus e brezhoneg eget e iwerzhoneg, muioc’h eget e kembraeg (!).

Gellout a reer sevel blogoù e brezhoneg penn-da-benn war nireblog, hag emaon o treiñ WordPress er mare-mañ evit ma vefe da zibab (zoken ma n’int ket gwall zisheñvel e kav din eo birvidikoc’h bedig WordPress, nevezenti a vez hogos bemdez). Gellout a rit dont da sikour amañ, ha kinnig ho troidigezhioù (din, hehe). Skype a zo e brezhoneg, Firefox kement-all, Opera a oa bet troet, hogen n’eo ket bet graet evit an doare nevesañ c’hoazh, ur reizher a zo evit Word, OpenOffice a zo bet troet hag emañ an Ofis (ket open ar wech-mañ) o treiñ Windows (betek ‘goût)… Tu a zo da gaout spi e vezo ledetoc’h c’hoazh ar brezhoneg er bloavezhioù a-zeu. Ha dre se marteze e vo dedennetoc’h an dud 🙂

Ar gudenn vrasañ a chom dianaoudegezh ar gerioù. M’eo anat ar c’heriaoueg galleg (ha saozneg zoken) evit an darn vrasañ ac’hanomp e c’hell bezañ diaesoc’h kompren petra eo un arlun, petra dalvez hizivaat, ha petra an diaoul eo furmad ur restr (ma digarezoù d’an Ofis, hogen ‘restr’ ? Sirius ? Ober a ra an holl gant fichennaoueg abaoe bloavezhioù; piv a gompreno hag a implijo ‘restr’ ?). Ma n’eo ket gwall c’hrevus kement-se pa vezer e darempred gant tud a vicher eo diaesoc’h diouzhtu p’emañ ‘ar bobl’ o klask brezhonegañ. Daou dra a c’heller ober: implij gerioù ‘treuzwelus’, aes da gompren, anat, gant ar riskl a zo da chom re dost d’ar galleg; pe deskiñ ar gerioù-se d’an dud en ur skignañ anezho ar muiañ ar gwellañ evel ma oa bet graet gant pellgomz ha skingomz, o deus kemeret lec’h telefon ha radio bremañ. ‘Pezh zo: anat a-walc’h eo gerioù evel pellgomz. Pell. Komz. Pouf ! Anat ! Furmad ar rest, not so anat.

Diwallomp, diwallomp, sot ‘vefe troc’hañ brezhoneg ar stlenn diouzh ar re yaouank ! Ha pa lavaran yaouank e soñjan yaouank-mat, ket kozh traoù eveldon, koshoc’h eget 20 vloaz (haha !). M’eo ret dezho mont da weet war Termofis (en deus kemeret lec’h Termbret) bewech ma vez ul lec’hienn oc’h implij brezhoneg en he melestradur, ne yelo ket an traoù war-raok. Spi am eus e vez implijet ar gerioù-se e Diwan hag er skolioù all. Ha ma ne vez ket em eus spi e cheñcho an Ofis e soñj hag ober gant ar gerioù a vez implijet gant ar gelennerien.

Daou zoare a zo da sevel geriadurioù: diviz en ur bodad ar pezh zo reizh hag ar pezh n’eo ket (an doare gall peurvuiañ) pe selaou eus ar pezh a lavar an dud ha en lakaat er geriadur (an doare saoz peurvuiañ). N’ouzon ket ma zo unan gwelloc’h eget egile, ne vo ket reizh bepred ar pezh a lavar an dud ha ne vo ket heuliet alioù ar bodadoù bepred. Buan a-walc’h koulskoude e vo gwelet ma chom ar gerioù-se bev en diavaez d’an nebeud a dud o implij war ar pemdez (da lavaret eo troerien, ha tud a-youl-vat wiki, a c’hell bezañ an hevelep tud.)

p.s: echuet am eus al levr a gomzen diwar e benn an deiz all, Breton Orthographies and Dialects, Vol. 1: The Twentieth-Century Orthography War in Brittany, dedennus evel ma lavaren, hogen c’hwitet gantañ ar c’hlozañ penn-da-benn. Penn. Da. Benn. War a seblant n’en deus desket netra diwar ar brezel a zo bet dija. Ma ! Deomp-ni da vezañ finoc’h.

p.p.s: gwelet o peus skritell an Erer Kozh ?! Du-hont e vin evit ar 4 devezh ar bloaz mañ 😀 (gant ma c’hoar ^^)

p.p.p.s: gâ ! post scriptuuuuum !