Yezhadur #3

N’eo ket yezhadur da vat, geriaoueg kentoc’h… Met gellout a ra terriñ ma revr kement-all. Ket evel lenner da vat, met pa skrivan kentoc’h, rak fellout a ra din bezañ komprenet, ket treuzkomprenet. Neuze:

Riklus ≠ Risklus !

Pa gleven lod o komz eus mont d’ar poull-risklañ e Roazhon em lakae da c’hoarzhin (en diabarzh, ne ran ket goap eus an dud, memestra ^^). Ma, risklus e c’hell bezañ, met ur poull-riklañ eo kentoc’h  ^^ (pe ruzikat, evel-just, m’ho peus divizet bezañ hegasus 😀)

Risklus: arvarus, dañjerus

Riklus: a c’heller riklañ warnañ (zwiiiiip !), a c’heller fiñval traoù warnañ hep na frotfe, hag all

Agnagnagna, a glevan dija, emañ e geriadur Favereau, hag evel eil-ster evit risklañ ‘barzh an Here emañ merket ‘sellet ouzh riklañ’…Ya, gwir eo marteze, hogen diazezet eo hini Favereau war an implij pemdeziek… A zo fall ^^

Hag un difoc’h a zo etre un dra risklus hag un dra riklus peurvuiañ, neketa ? N’eus ket ? Pa vez riklus e vez risklus ivez peurliesañ, ha ket ar c’hontrol ? Beñ setu perak eo bet dalc’het ur ger evit an 2 ster gant ar yezh-pobl, peogwir ez eus bet graet un heñveladur. Ha n’eus ket eus an heñveladur-se bepred ! Pa fell din lavar eo riskl-us un dra bennak peogwir ez eus ur riskl, neketa, ket ur gwiskad skorn >_<

Riklañ/risklañ, aes ober ar fazi, dre gomz dreist-holl, met daou c’her a zo, tudoù, greomp ganto ! A-du emañ an Ofis ganin ouzhpenn-se 😉

*sponsoret eo an notenn-mañ gant strollad ar c’heriaouerien dorr-revr*

Ha tresoù tenn an treser o tresañ un dresadenn dres ‘barzh an traezh…

Tresañ a blij din… Kalz… Un tammig re zoken, hervez ma c’haieroù, aet skuizh ma ‘z int o welet tresadennoù oc’h aloubiñ hag o trevadenniñ ma notennoù. Klask a ran derc’hel ur follenn a-gostez evit tresañ, kentoc’h, hogen n’eo ket gwall efedus 😀 Pe kregiñ er marzoù, ha soñjal ne yin ket maez, ohoho !

Ha ne dresan ket re fall. Gwelloc’h eget tud zo, kalz falloc’h eget lod all (bah, goulennit digant forzh peseut treser, ne vezo morse laouen gant e dresadennoù, dreist-holl ma seblantont disi deoc’h… Argh !). Gwelet a reot a-benn ur mare forzh penaos. Hogen ar pezh a zo dedennus a zo pegen fall e tresen n’eus ket pell zo, ha pegen falloc’h c’hoazh a-raok. Bez zo tud a zo donezonet, a dres mat diouzhtu pe dost, a gompren penaos e ya en-dro, penaos ober. Hogen gellout a ra forzh piv deskiñ. Ha pa lavaran deskiñ, biskoazh n’em eus bet kentelioù, damsellet ‘m eus bet ouzh levrioù ‘deskiñ tresañ’, kavet anezho borrodus as hell.

 Neuze em eus treset, ha treset c’hoazh, ha c’hoazh, dreist-holl ar pezh ne zeuen ket a-benn da dresañ. Dre ma ‘z on pennek me ivez ez on bet gouest da ouestlañ ma amzer da dresañ daouarn hepken e-pad ur bloavezh, pe daoulagad, pe dremmoù, hag all. Lorc’hus a-walc’h e oan eus an tresadennoù a raen d’ar mare-se, ha mezh spontus ganin en ur sellet outo ur mare war-lerc’h; ha muioc’h c’hoazh bremañ.  -_-‘

Met mont a ran war-raok, ha buanoc’h buanañ, dre m’eo tresañ evel pep-tra, ur wech diazezet an diazezoù (n’eo ket brav an tamm frazenn-se ? Hañ ?) e ya buanoc’h hag aesoc’h. Neuze ma c’hellan me deskiñ tresañ, tamm-ha-tamm, e c’hell forzh piv en ober, dreist-holl en ur heuliañ kentelioù. Tud zo a lavar din “oh, brav e tresez… C’hoant am befe gouzout tresañ.” Bah, n’eo ket diaes, tresit. Tresit, ha tresit c’hoazh, ha c’hoazh. Kregiñ eo an diaesañ, peogwir e weler-mat pegen fall eo (ha c’hoazh, gwelet am eus tud laouen gant traoù… iskis.. gwell-a-se evito). Aesoc’h marteze pa vezer yaouankoc’h (er skol-vamm e oamp laouen gant boulommigoù savet gant ur c’helc’h hag un nebeut skourroù ^^), hogen pegen laouen e vezer pa zeuer a-benn ! Netra plijusoc’h. Ha dont a ra e-unan, dre forzh tresañ. Hogen mar fell deoc’h gwellaat hep mont da gentel ebet (pe hep levrioù/lec’hiennoù internet/video-où/me-oar-me-où; kalz traoù a zo da sikour ac’hanoc’h), bezit prest da dresañ kalz, hogos bepred, ha da aloubiñ o kaieroù/follennoù/taolioù/… 😀

Neuze ma fell deoc’h tresañ, tresit. N’hellit mont nemet war wellaat, forzh penaos.

Ha setu me distro da dresañ treid 😉

(Hag ur wech e soñj deoc’h n’oc’h ket re fall e c’hellit mont aze ha leñvañ : cghub )