Dramm

 

Hehe, trugarez tudoù ^^ Ur blijadur bepred lenn ar pezh hoc’h eus da lavar, eus ar berrañ smiley d’an hirañ soñj ! D’am soñj eo unan eus an abegoù ma vez savet blogoù gant an dud, evit ezteurel ar pezh a vez da lavar, ya, hogen evit resevout alioù ar re all  ivez, ha gwelet ez oc’h bet lennet. Hep an evezhiadennoù-se e vefe an holl destennoù a skrivan evel boutailhadoù bannet er mor, kollet ganin hep gouzout re vat da belec’h emaint aet; piv en deus o lennet ha petra o deus soñjet. 

Setu perak em eus aon un tammig rak embann, pe bezañ embannet kentoc’h. Pa oa evit Priz ar Yaouankiz e oa anat ar respont, ur genstrivadeg e oa, gouzout a rafen buan daoust ha plijet en doa ar skrid pe get ! N’eus ket tu da lavar e oan beuzet e morad al levrioù kinniget. Met aze ? E-touez ar c’hant (-mil :D) den a vo dedennet gant al levr, pet a zeuio da lavar din pegen null eo (pe pegen mat, hañ, alioù positivel n’int ket displijus ^^) ? Hep soñjoù ar re all hag o alioù ne ‘z eer ket war-raok, chom a reer da neuial a gelc’h en hevelep poull (ya, metaforennoù diwar-zour hiziv). Pa ne vez ket lavaret deoc’h ar pezh ne ya ket, penaos gwellaat ? Ha ma ne vez ket lavaret deoc’h petra a zo mat, penaos gouzout eo ret derc’hel ganto ? 

Marteze ez on me kablus un tammig, rak ne gredan ket reiñ ma soñj bepred, pe kemer amzer da skrivañ un draig pa lennan traoù dedennus, koulskoude e ouzan mat pegen plijus e c’hell bezañ sevel da vintin ha gwelet evezhiadennoù ouzh ma gortoz (me ur geek o lakaat e urzhiataer war-enaou a-boan savet ? me ? Tamm ebet, war-enaou e vez a-raok din sevel zoken :D). Bezañ diouzh an evezh a zo plijus, hag holl e fell deomp bezañ merzet, d’am soñj. Gwir eo e c’hell dont da vezañ un dramm un tammig, ha me da hizivaat ar bajenn meur a wech bemdez da welet ma zo traoù da lavar, war ar blog-mañ pe foromoù a gemeran perzh eno, pe me-oar-me. Gant internet hiziv an deiz eo kalz aesoc’h reiñ e soñj da viliadoù a dud, hag e c’heller kaout respontoù a bep lec’h hag a bep doare, ar pezh a ra e c’hell bezañ dedennus-spontus (pe ur brezel trolled, ivez). 

N’am eus biskoazh butunet an disterañ tra, ha ne evan ket kalz kennebeut (ma, ret eo din evañ kaaaaaaaaalz a-raok bezañ mezv, ha ne zegas ket efedoù gwall blijus da c’houde, neuze ne c’hoarvez ket alies ^^), lakaomp emañ aze ma dramm, ma si ^^ “Moran eo ma anv, ha suj on d’an evezhiadennoù”, an ED, Evezhiadennourien Dianv. Alala ! Arabat deoc’h en em santout rediet da lezel tra pe dra ma ne fell ket deoc’h (met ma ‘z eus nebeutoc’h eget 5 evezhiadenn war an notenn-mañ e yelo fall-tre an traoù ! ^^). D’am soñj emañ an efed-se abeg da ziorren al lec’hiennoù evel Facebook ha Twitter (ha, gwashoc’h c’hoazh, Foursquare), an ezhomm bezañ merzet ha kaout ur respont digant ar re all, etre gasterezh ha sellerezh. N’on ket d’ar poent ma vin maleürus ma n’eus evezhiadenn ebet, dre eurvat (!), ha n’am eus ket ezhomm diouto per se, met plijus eo, anzav a ran.

Ma, trawalc’h gant ma rambreal, trugarez deoc’h.

Stlenneg

Pegen rouez ar brezhoneg war an Etrerouedad ! War-bouez wikipedia hag an nebeud lec’hiennoù ofisiel amañ hag aze eo ret anzav n’eus ket kalz a dra. Hag ar pezh a vez kavet a zo liv ar c’hozh warnañ alies (lec’hiennoù doare ar bloavezhioù ’90 -_-‘). N’eo ket aes ober traoù brav atav, dreist holl pa vez diouer a arc’hant. Diaes ivez ober kement a strivoù pa ouzer ne vo nement 4 den o tont bep miz (ha n’eo ket gwall zisheñvel war ar blog-mañ, gouzout a ran mat ^^). Ur sapre labour a zo bet graet, hag a vez graet c’hoazh, war Wikipedia (hag ar wikeriadur) memestra, muioc’h a bennadoù hon eus e brezhoneg eget e iwerzhoneg, muioc’h eget e kembraeg (!).

Gellout a reer sevel blogoù e brezhoneg penn-da-benn war nireblog, hag emaon o treiñ WordPress er mare-mañ evit ma vefe da zibab (zoken ma n’int ket gwall zisheñvel e kav din eo birvidikoc’h bedig WordPress, nevezenti a vez hogos bemdez). Gellout a rit dont da sikour amañ, ha kinnig ho troidigezhioù (din, hehe). Skype a zo e brezhoneg, Firefox kement-all, Opera a oa bet troet, hogen n’eo ket bet graet evit an doare nevesañ c’hoazh, ur reizher a zo evit Word, OpenOffice a zo bet troet hag emañ an Ofis (ket open ar wech-mañ) o treiñ Windows (betek ‘goût)… Tu a zo da gaout spi e vezo ledetoc’h c’hoazh ar brezhoneg er bloavezhioù a-zeu. Ha dre se marteze e vo dedennetoc’h an dud 🙂

Ar gudenn vrasañ a chom dianaoudegezh ar gerioù. M’eo anat ar c’heriaoueg galleg (ha saozneg zoken) evit an darn vrasañ ac’hanomp e c’hell bezañ diaesoc’h kompren petra eo un arlun, petra dalvez hizivaat, ha petra an diaoul eo furmad ur restr (ma digarezoù d’an Ofis, hogen ‘restr’ ? Sirius ? Ober a ra an holl gant fichennaoueg abaoe bloavezhioù; piv a gompreno hag a implijo ‘restr’ ?). Ma n’eo ket gwall c’hrevus kement-se pa vezer e darempred gant tud a vicher eo diaesoc’h diouzhtu p’emañ ‘ar bobl’ o klask brezhonegañ. Daou dra a c’heller ober: implij gerioù ‘treuzwelus’, aes da gompren, anat, gant ar riskl a zo da chom re dost d’ar galleg; pe deskiñ ar gerioù-se d’an dud en ur skignañ anezho ar muiañ ar gwellañ evel ma oa bet graet gant pellgomz ha skingomz, o deus kemeret lec’h telefon ha radio bremañ. ‘Pezh zo: anat a-walc’h eo gerioù evel pellgomz. Pell. Komz. Pouf ! Anat ! Furmad ar rest, not so anat.

Diwallomp, diwallomp, sot ‘vefe troc’hañ brezhoneg ar stlenn diouzh ar re yaouank ! Ha pa lavaran yaouank e soñjan yaouank-mat, ket kozh traoù eveldon, koshoc’h eget 20 vloaz (haha !). M’eo ret dezho mont da weet war Termofis (en deus kemeret lec’h Termbret) bewech ma vez ul lec’hienn oc’h implij brezhoneg en he melestradur, ne yelo ket an traoù war-raok. Spi am eus e vez implijet ar gerioù-se e Diwan hag er skolioù all. Ha ma ne vez ket em eus spi e cheñcho an Ofis e soñj hag ober gant ar gerioù a vez implijet gant ar gelennerien.

Daou zoare a zo da sevel geriadurioù: diviz en ur bodad ar pezh zo reizh hag ar pezh n’eo ket (an doare gall peurvuiañ) pe selaou eus ar pezh a lavar an dud ha en lakaat er geriadur (an doare saoz peurvuiañ). N’ouzon ket ma zo unan gwelloc’h eget egile, ne vo ket reizh bepred ar pezh a lavar an dud ha ne vo ket heuliet alioù ar bodadoù bepred. Buan a-walc’h koulskoude e vo gwelet ma chom ar gerioù-se bev en diavaez d’an nebeud a dud o implij war ar pemdez (da lavaret eo troerien, ha tud a-youl-vat wiki, a c’hell bezañ an hevelep tud.)

p.s: echuet am eus al levr a gomzen diwar e benn an deiz all, Breton Orthographies and Dialects, Vol. 1: The Twentieth-Century Orthography War in Brittany, dedennus evel ma lavaren, hogen c’hwitet gantañ ar c’hlozañ penn-da-benn. Penn. Da. Benn. War a seblant n’en deus desket netra diwar ar brezel a zo bet dija. Ma ! Deomp-ni da vezañ finoc’h.

p.p.s: gwelet o peus skritell an Erer Kozh ?! Du-hont e vin evit ar 4 devezh ar bloaz mañ 😀 (gant ma c’hoar ^^)

p.p.p.s: gâ ! post scriptuuuuum !