Dre ziouer !

Sell ‘ta, pell zo ne oa ket bet lakaet un dresadenn bennak ganin amañ. Pell zo ivez marteze n’em boa ket bet echuet unan… Ur bern a zo bet kroget ganin, brastreset, damlivet… Met dre ziouer a amzer n’em eus ket bet tro da gas kalz anezho da benn. Ur wezh bennak e rin un tamm bandenn-dreset hir ivez (eh, ne vez ket kalz anezho e brezhoneg war-eeun…)… Gant ma breur marteze, a zo leun a ijin hag en eus krouet ur bed moliac’hel klok a-walc’h, pe unan skiant faltazi… Pa vezo amzer… Evit se ha kement a draoù all…

Gwelet a ran memestra emañ ma doare o kemm, deus unan tostoc’h da zistummadur ur manga d’unan tostoc’h d’ar gwirvoud bremañ, hag awenet muioc’h gant doare ar c’homiks amerikan, sur a-walc’h (daoust din na lenn hini ebet !). Ul labour hirik am eus bet graet diwar luc’hskeudennoù evit gwellaat ma zresañ-korf. Gwelet e vo eta ! War an ardremezioù emaon e soñj pleustriñ bremañ kentoc’h. Un nebeud traoù am bo da ziskouez a-benn nebeut a-walc’h, sañset…

Klikidi-klikit evel boaz d’o brasaat mar fell deoc’h, evel-just.

Tresañ divc’har… N’eo ket aes ! Plijout a ra din skeudiñ e glas war gwenn, dousoc’h eo. Lod o deus bet lavaret din e oa un doare french-touch, feuket on bet evel-just, haha !

Evit ur vignonez ur wezh c’hoazh, hag o pellaat un tammig eus ar merc’hed re dreut.

Bannoù-treset

Ur mare ‘zo em boa kemeret perzh en ur genstrivadeg bannoù-treset e brezhoneg… Ne oa ket kalz tud o kemer perzh neuze em eus gounezet, haha ! Met spi ‘m eus e vo lod ac’hanoc’h o kemer perzh ar bloaz a-zeu ! N’eus nemet ur bajennad da ober…

Klikidi-klikit evit brasaat, evel-just !

Gant ur bajennad n’eo ket aes kontañ un istor luziet, neuze e oa an aesañ din mont gant ur gag. Erevent, elfed, orked, moliac’h dre vras, traoù zo ne cheñchont ket !

Ultramarine

Boh, n’eo ket nevez-nevez, met n’em boa ket e lakaet amañ. Warhammer goud Star Wars, n’eo ket Soubenn ar Geek amañ met Soubenn an Nerd marteze 😉

Ya, ur fanboy Ultramarine divezh on, hahaha, met ar pezh a zo plijus gant bed Warhammer 40,000 dre vras a zo eo digor pep-tra eno. Forzh peseurt istor pe dudenn a fellfe deoc’h kontañ pe grouiñ a c’hellit ober. Ur stergoumoulenn a-bezh a zo da zizoloiñ, milionoù, miliardoù a vedoù ha degadoù a ouennoù a-bep-seurt. Ar Space-Marined (sic) evel an hini amañ-dindan a zo aozet dre Chabistroù mil soudard, ha gellout a ra pep hini ijinañ e strollad mar fell dezhañ (pe chom gant unan bet krouet dija, evel-just). Betek-hen em boa dibabet chom gant ar re vrudetañ (na pegen dibar, haha !), hogen nevez zo ez on kroget da sevel lod nevez, d’o livañ ha da ijinañ o istor. Ur wezh all e vo kaoz diwar o fenn marteze, met evel a lavaren dec’h eo plijus a-wezhoù en em goll en ur bed faltazius…

(Da geñveriañ gant an dresadenn-mañ marteze, haha. Mont a raer war-raok e doug daou vloaz, emichañs.)

Planedennoù home-made !

g.s. n’en deus netra da welet : 850 string a zo bet troet ganin hiziv, ha kadarnaet un 230 bennak ouzhpenn. Spi ‘m eus e teuio ar cheñchamantoù war-wel buan.

10e53 g.m.

10e43 g.m.

Edo Beethoven gant eil luskad e seizhvet siñfonienn —allegretto— hogen ne gleve-hi mui ar sonerezh gant trouz an dour a strinke, klouar ha hoalus, war veg he bizied. Treiñ ar c’hog a reas war an tomm un disterig c’hoazh, ha mont er gibell, sarr he daoulagad ganti. Un devezh skuizhus e oa bet, ur wezh c’hoazh, ha mall a oa warni mont da ved ar c’housk. Redek a rae an dour war he dremm, a-hed he choug hag he c’hein, aezhenn o sevel tamm-ha-tamm er sal-dour re enk ha digempenn. N’he doa ket amzer d’ober war-dro an ti e gwirionez. N’he doa amzer evit hogos netra. Peurc’hlebiañ a reas he blev gwennaet. Ne glevas ket dornell an nor-dal o wigourat

10e45 g.m

Stlabez a oa en ti, levrioù war an daol, un urzhiataer damzigor war ar gourvez-vank, goloioù-lizher diroget ha lizhiri chomet dilenn, un asied ha loaioù lous war an daol-izel, e mesk teuliadoù ha tasadoù kafe aet yen pell a oa. Serriñ a reas-eñ an nor didrouz, prennañ, ha mont-tre e mesk an direnk. Ur bladenn a oa el lenner, hag ul laz-seniñ o vont gant e don. Mozart, sur a-walc’h, an doare traoù a vez selouet da dreveziñ bezañ desket. Ma, ne oa ket ur strollad soft-rock brein, d’an nebeutañ ; Hotel California, ma revr. War enaou e oa ar gouloù e pep-lec’h. Mont a reas goustadik ha didrouz betek ar gambr. Prop a-walc’h e seblante pep-tra bezañ aze, pleget mat al liñserioù ha renket an dilhad. Un dilhad-noz pleget a oa war ar c’holc’hed, o c’hortoz bezañ gwisket goude ar strinkadenn emichañs. Netra gwall zedennus. Ne oa roud ebet eus ur gwaz en ti.

10e46 g.m

Soavon a oa ganti leizh he blev, ur c’hwezh dous, evel ur goavenn-frouezh. Naon he doa. Ket naon da vat marteze. Ur c’hoant. C’hoant gwastilli. Marteze e chome un tamm tartezenn avaloù er yenerezh. E lakaat a rafe da dommañ, ha ledañ skorn-vanilhez warnañ. Netra gwelloc’h evit he lakaat da vousc’hoazhin. Gant ur c’hlak! trouzus e tivontas ar voutailhad soavon-korf. Ne oa ket kerkoulz ar c’hwezh gant hemañ, met ne rae forzh. A feur ma walc’he he c’horf e walc’he he spered. Re a draoù a oa ennañ, re a draoù lous ha teñval, re a c’houlennoù, re a dud kavet ganto respontoù fall. Sodien, emezo, loened gouez, eme lod all, boued ar groug, lod all c’hoazh. Ma vije bet eus ar boan a varv c’hoazh e vefe bet laouen tud zo. Hi avat a wele ur miltamm e kement den, diaes pe ziaesoc’h an diskoulm anezhañ. N’helled ket kemer un tamm da varn ar skeudenn a-bezh, ledentaladañ an dud. Ne oa ket deuet da vezañ bredvezegez evit barn. Diaes e c’helle bezañ koulskoude, bevañ bemdez gant kudennoù ar re all, gant o bed distumet pe zistum penn-da-benn ha— He dremm a riñsas trumm ha digeriñ he daoulagad. Un trouz he doa klevet ? Redek a rae an dour war he bruched, a save buan gant he anal ha talm herr he c’halon bremañ.

10e47 g.m

Wagner, marteze, a soñjas, re nerzhus e oa ar sonerezh evit Mozart, a-benn ar fin. Ne rae forzh, e gwirionez. Dastum a reas ul levr war an daol, D. L. Dobbert,  Halting the Sexual Predators Among Us: Preventing Attack, Rape, and Lust Homicide. Ne oa ket ur mailh war ar saozneg, met ne oa ket diaes kompren an dodenn. Mousc’hoarzhin a reas. Ne rafe an nimezell hunvreoù brav fenoz, gant seurt lennadennoù. En e lec’h e adlakaas al levr. E bouez a daolas war ar gourvez-vank ha digeriñ an urzhiataer-hezoug. Ne oa ger-tremen ebet, tut-tut-tut, ne oa ket fur, dimezell. Petra a c’hoarveze gant an nimezelled ne oant ket fur ? Sellet a reas eus ar posteloù diwezhañ. Mallus e oa unan. Aet e oa unan eus ar glañvien diwar-wel, war a seblante. Unan dañjerus, ouzhpenn-se. Tut-tut-tut, ne oa ket bet graet mat o labour gant tud zo. Peseurt kleñved a oa gantañ ? Ne oa ket bet skrivet er gemennadenn. Sur a-walc’h e oa e deuliad e lec’h bennak er stlabez. Tut-tut-tut, penaos adkavout an traoù ma ne vezont ket renket, dimezell ?

10e48 g.m

Ne gleve netra ken, ha ne grede ket lazhañ an dour, aon ganti ma vefe un dra bennak da vezañ klevet. Gant he dorn e flouras pleksiglas ar werenneg a oa a-hed ar gibell, da dennañ ar vurez diwarnañ. N’he sikourfe ket da glevet, hag evel ma kuzhe he c’horf d’an diavaez e kuzhe ar sal-dour dezhi. Soñjal a reas buan. Prennet e oa bet an nor ganti en ur zont-tre. Sur. Sur-mat. Pe get ? N’ouie mui. Seurt jestroù ken boutin ken ma vezont disoñjet ; ha ken pouezus koulskoude. Ne oa ket aonik, pell alese, ha ne oa ket o vevañ en ul lodenn dirapar eus kêr, met piv a ouie ? Soñjal a reas c’hoazh. Ne oa netra er sal dour dezhi d’en em zifenn. Ne oa netra en ti a-bezh, e gwirionez. Biskoazh ne oa bet plac’h an armoù. Piv a c’hellfe bezañ deuet-tre ?  Gouzout a rae mat dre he labour e vefe an dud tost a vefe feulz an eil gant egile peurvuiañ. An arall, an estrañjour dañjerus ne oa nemet un direizhder er stadennoù, stultenn an tu-dehou pellañ. Met ne oa den tost dezhi. Dorioù he doa sarret tamm-ha-tamm (hag hini he ranndi ? Daoust ha prennet e oa bet ?), ha kaset maez eus he buhez darn vuiañ ar re he doa anavezet. N’he doa ket amzer. Re a labour he doa, re a draoù da ober a oa pouezusoc’h eget bezañ eürus, evit ar mare. Penaos tennañ splet eus an amzer-vak pa c’helle sikour lod all dre labourat ? Perak e telfe hi tremen dreist hag a-raok ar re a c’helle sikour ? Troc’hañ berr a reas he soñjoù. Petra ober bremañ ? Redek a rae an dour warni c’hoazh, ha daoust d’ar wrez edo o krenañ.

10e49 g.m

Tostaat a reas eus ar sal dour, sachet gant trouz an dour o strinkañ ha frond an aezhenn domm. Diwall mat a rae na vale war al levrioù hag ar seier a oa war al leur, ar c’helaouennoù, ul lenner mp3. Ur souezhadenn a felle dezhañ bezañ. Mousc’hoarzhin a reas adarre. Daoust ha plijout a rae ar souezhadennoù dezhi ? “Surprise, motherfucker !”, ah, Dexter… Aet e oa an heuliad da fall e-kerzh ar bloavezhioù diwezhañ. Daoust ha klañv e oa eñ, doktor ? Daoust ha klañv e oa bred an holl vuntrerien, pa ‘z eo bet doare pennañ mab-den da vont gant o c’hudennoù ? Dasout ha klañv eo an deneliezh ? Ma ‘z eus bet eus un deneliezh. Den n’eo lies, doktor, war-bouez ar skizofreneg. Met ho micher eo.

10e50 g.m

Ne oa ke he hezoug ganti, na war vord ar gwalc’heris nag e sakod ar bragoù du a oa war ur gador nepell. Chomet e oa war an daol. Er-maez. Da c’hervel piv forzh penaos ? An archerien ? Peogwir he doa klevet un trouz, marteze ? Perak e oa o krenañ en he strinkadenn evit netra ? Netra. Sur a walc’h. He blev a riñsas ar buanañ ar gwellañ, ha troc’hañ trumm an dour. Didrouz. Ne oa na red avel na planchod da wigouriñ en ti. Ha ne gleve netra ouzhpenn. Hunanadiñ a reas. O vont gant ar filiped e oa, a dra sur. Na fentus. Re a wask warni, emichañs. Ret a boanioù. Stegn e oa he divskoazh evel funioù-dir ur vag. Ur serviedenn a lakaas warno ha tro d’he c’horf. Don ec’h analas ur wezh c’hoazh, ha dianalat pell. Sioulaat a rae tamm ha tamm, troet he c’hein ganti ouzh an nor damzigor. Ne oa netra er-maez. Ne oa den. N’he doa ket aon da gaout.

10e51 g.m

Ur sell a daolas dre ar faout gouloù. Ur serviedenn roz. Evel just. Pellaat a reas, kuit dezhi da dreiñ trumm ha d’e welet. Re abred e oa. Ne vefe ket ur souezhadenn ken m’he gwelfe a-raok dezhañ bezañ divizet. Aotreet. Ne vije ket fentus, neketa ? Pouezus e oa ar fent. Ur fentigell a anaveze: Petra zo hir, kalet, ha leun a wad ? Pennoù-bazh paotred Mari-Robin ! C’hac’hac’hac’ha ! Ne oa ket ken farsus ha lod all, met ne zalc’he ket soñj eus ar re a veze kontet dezhañ. Lod ne c’hoarzhent ket. Ne oa fent ebet ganto. E veilhoù-dorn a stardas. C’hoarzhin a rafe, hi. Un taol troad a skoas gant dor ar sal-dour. Souezhadenn, doktor.

10e52 g.m

Yudal a reas ha souzañ betek ar werenneg. Un den. Ur gwaz. Daoust hag anavezout a rae anezhañ ? En he sal-dour e oa. Piv ? Penaos ? Perak ? Sellet a reas en-dro dezhi, da glask un dra bennak. Forzh petra. En em zifenn.

Ur bistolenn a oa gantañ. Unan mod-kozh, gant un daboulin, c’hwec’h boled. Un draig vil, lous. Pounner. Sevel a reas anezhi hag he bukañ warni. Edo Beethoven o kregiñ gant ar Presto, trede luskad.

“Petra ‘fell deoc’h ? Piv oc’h c’hwi ?” emezi, o klask sioulaat. Ne seblante ket bezañ diwar zramm, na mezv. Tennañ a rae da unan bennak. Piv ? Ret e oa dezhi klask ampellaat e raktresoù. Forzh pe zoare raktresoù e vefe. Stardañ a reas he serviedenn.

Mousc’hoazhin a reas. “Pell zo e felle din ho kwelet en-dro, doktor.”

Ec’h anavezout a rae. Gwelet he doa bet anezhañ ur wezh dija. En ur servij all. Pehini ? Penaos e oa deuet betek amañ ?

“Ur souezhadenn a felle din ober deoc’h. Plijout a ra ar souezhadennoù deoc’h, ya ? Plijus o c’havit, ya ?”

Parañ a rae he selloù en he re. Ne oa ket dispourbellet e zaoulagad, ne seblante ket rambreal en ur bed all. Klañv e oa koulskoude. N’helle den ober seurt traoù diabeg. Fiziañs he doa e mab-den, setu perak e oa aet da bredvezeg, peogwir emañ ar mad stad orin an dud. Kement tra a c’hell distreiñ d’e orin. Kement-tra. “Perak ez eus un arm ganeoc’h ? Ur souezhadenn eo ivez ?” Goulennoù, lakaat anezhañ da gomz, arabat bezañ taer na tagus.

Sellout a reas ouzh an arm, e viz war ar bluenn anezhañ. “Ya, ya, ur souezhadenn, sellit !” Gwaskañ a reas war ar bluenn. PAW ! Bouzaret e voent o daou.

10e53 g.m.

Gervel an archerien. An ospital. Gervel unan bennak. Gwad a oa e pep-lec’h.

“Ne felle ket din ken, doktor. Ne felle ket din bezañ ma-unan.” Gwaskañ a reas war ar bluenn ur wezh ouzhpenn, ha mervel.

Soñj he doa. Diwask. Emzivad. Techet d’an emlazh. Lezet da vont tri miz a oa. Penaos en doa gallet kaout ur bistolenn ? Ha kavout anezhi ? Perak ? Diwezhatoc’h. Redek a reas da dapout he fellgomz. Digor edo hec’h urzhiataer, ar postel war ar skramm. Ur c’hlañvad a oa achapet kuit. Unan all. A-walc’h he doa bet gant unan an noz-se. Prennañ a reas an nor, ha gervel. Marv e oa, ne oa ket mall e gwirionez. Hogen piv a c’hortozfe ? Dour a oa war he dremm c’hoazh. Holen. Daeroù. Ne oa ket deuet eviti. Pe eviti hepken ? Dezhi da vezañ test ? An hini nemeti he doa e selaouet, marteze. An hini nemeti he defe soñj.

10e53, noz. Soñj he defe. Bemnoz.

Brezelvorzhol ?

Re a Warhammer ? Morse, ma den mat.

(klikidi-klikit da vrasaat)

O pleustriñ emaon c’hoazh war al livañ gant ‘toshop, kentoc’h eget tresañ. Labour ‘zo, hag amzer n’eus ket, met mont a ra war-welaat memestra, goustadig. Ur mare zo dija eo bet graet homañ (rak ur mare zo n’on ket bet evit tresañ, evel a lavaren dec’h). Ma ! Dont a raio. Evit a denn d’ar skeudenn end-eeun, evit ur forom bennak e oa, savet ganto ur Chabistr (?) Space Marines, gant al livioù se.

Periparus ater

N’eus ket kalz a dra da lavar, e gwirionez, laouen a-walc’h on gant honnezh… Laouen-tre zoken ! O labourat war ar stummoù emaon er mare-mañ kentoc’h (pe e oan, n’em eus ket bet tamm amzer evit tresañ abaoe sizhunvezhioù… nag evit skrivañ amañ kennebeut…)

Harozed

Kemer perzh e c’hoarioù-rol a-stroll a zo un abadenn dudius peurliesañ, ha n’eus netra plijusoc’h eget krouiñ tudennoù hag o lakaat da vevañ, da gejañ ha da genvevañ gant ar c’hoarierien all. Ha peurliesañ e ouzit tamm pe damm da betra e tennont, en ho penn d’an nebeutañ.

D’ar mare-se eo peurliesañ e soñj Mestr ar C’hoari, pe ar Vestrez en degouez-mañ, e anavez un treser a c’hellfe reiñ korf d’ho tudenn ^^ E-giz se eo c’hoarvezet evit ar stollad-mañ, en Alamagn, atav. Dedennus e oa gwelet pegen resis pe amresis e c’helle an tudennoù bezañ e penn ar c’hoarierien. Dragonfly, da skouer, a zo bet aes-tre da dresañ, ken sklaer ha resis e oa an diskrivadenn bet roet din, betek an disterañ munud.

(gellout a rit klikidi-klikañ war ar skeudennoù d’o brasaat, evel-boaz)

Bluecoat, er c’hontrol, ne oa nemet un nebeud soñjoù (peogwir eo ur paotr a c’hoari anezhañ, marteze :p), ha din me d’e ijinañ tamm pe damm. Dre an istor e doa hag e berzhioù er c’hoari e oa aes a-walc’h ijinañ peseurt doare den e c’helle bezañ.

Eva, hi, a oa etre an daou. Un daolennadur dre vras, gant un nebeud munudoù resis (ar gapenn, liv al lunedoù, liv ar glogorenn en he zro, traoù a-seurt se)

Hag ur wezh echuet gant an tresadennoù-us n’em eus ket gallet mirout rak ober un tamm pseudo-golo comicbook, d’ar strollad da stagañ ouzh ar voger pe me-oar-me. Simpl hag all, met plijet en deus dezho. “Erie” a zo ur c’hoari-gerioù etre al lec’h ma c’hoarvez o zroioù-kaer, nepell eus al lenn Erie, hag an anv-gwan eerie, a dalvez kement hag iskis, a ra aon, hag all. Ha dre ma oa “Eerie” un heuliad comics etre 1966 ha 1983 eo daou c’hoari-ger en unan (!).

Livañ… pe dost

Abaoe CS5 ez eus muioc’h a ostilhoù evit livañ da vat, evel gant pentur, e Photoshop. C’hoant am oa neuze da welet ar pezh a oa tu da ober, dre ma ‘z on null-brein gant ur barr-livañ peurliesañ ^^ Luc’hskeudennoù am eus kemeret da zave, c’hoariet un tammig gant ar broustoù kinniget hag ar pezh a ouzan ober gant ar poellad ha bam:

Farsus soñjal e fell d’ar stlenn distreiñ d’an traoù kent, ‘keta ?

Tresadennoù ? C’hoazh ?

Bah ya ! Daoust ma n’on ket bet o skrivañ amañ ez on bet oc’h ober traoù, memestra !

Hag un dro e bed Warhammer am eus graet adarre… Goude bezañ bet awenet gant un istor pe un dresadenn bennak em eus divizet tresañ un Inkizitour (pe un Imbouc’her, marteze ? Ne vije ket un droidigezh fall, d’am meno).

Un nebeud munutennoù da c’houde em boa un tamm brastres :

Divizet am oa e vefe un houarnwisk gantañ (ur gremmhouarnwisk, zoken), hag edo an I bras a-dreñv e benn da aroueziañ e garg (an I barennet, =][=, o vezañ arouezh an Imbouc’h, pe Inkizision neuze, e bed Warhammer 40,000). Ret e oa neuze ‘naetaat’ ar brastres, da gaout peadra da livañ da c’houde, hag ouzhpennañ munudoù:

Evel a welit ez eo bet dalc’het darn vuiañ an traoù ganin, stumm an divskoazh, ar vruched ledan, an doare en deus d’en em zerc’hel, ar vrec’h hag all. Un arm a zo bet roet dezhañ, cheñchet tu d’e benn un disterig hag ouzhpennet kinkladurioù e-leizh. Poent e oa neuze kregiñ da lakaat livioù dezhañ:

Hengounel a-walc’h an dibab livioù, du hag alaouret evit an houarnwisk, livioù a ya mat asambles, ruz evit ar gapenn, ul liv liammet gant ar galloud a-viskoazh (hag an Imbouc’h e bro Spagn, da skouer), glas da gempouezañ ar ruz. Ouzhpennet am eus an tammoù paper ivez, a vez kavet a-vil-vern e bed ‘40k. Peont neuze reiñ un tamm volum d’an dresadenn, gant skeudoù ha gouloù, ha lakaat un tammig gwiadezh enni:

Ha setu, graet an taol, tamm pe damm. Tu a zo da ouzhpennañ ur foñs bennak, un dalenn, met gellout a ra chom e-giz-se ivez. Met dre ma oan gant ma lañs…

Rawr

Heh, traoù seksi ur wezh ar mare, perak ket 😉 Ar pal a oa tostaat un tammig da stil ar bannoù-treset american tro ar bloavezhioù 60, un dra a-seurt-se… Plijet a-walc’h on gant an disoc’h, haha!

Pitika

Tudenn ur vignonez en ur c’hoari-roll 🙂

Doare Hellas/Roma, hag all, tamm pe damm; hag oc’h en em gannañ gant un doare Harpiez, sur ‘walc’h !

June

Anv ar plac’h eo June, ket ar miz, evel-just; din da c’houzout, n’emañ ket ar gwez-kerez e bluñv e miz Even 😉

Rawr

Goulennet e oa bet diganin tresañ tudenn ur vignonez evit ur c’hoari-perzhioù (Das Schwarze Auge, al Lagad Du, ur c’hoari-rol alaman n’eo ket bet troet kalz, siwazh), ha diwar un nebeud traoù he doa lavaret din hag un nebeud skeudennoù-diazez evit an doare dilhad hag an armoù em eus graet ur brastres buan ha buan eus ar gadourez doare mamlouk hag he dino, da ginnig dezhi (klikidi-klikit war ar skeudennoù d’o brasaat):

Dre ma oa laouen gant an disoc’h (ha me ivez, e gwirionez) em eus naetaet an dresadenn gentañ neuze, tamm ha tamm, betek kaout un drolinenn vrav. Kalz aesoc’h gant ur sklentenn, haha!

Ur wech graet an taol em eus graet un dra iskis, kregiñ gant ar skeudoù kentoc’h eget al livioù. Gant ‘toshop eo aes en ober ha cheñch ar gwiskad da c’houde evit ma rafe skeudoù brav war al livioù:

Plijout a ra din kalz e-giz-se e gwirionez, met n’eo ket re fall gant livioù kennebeut 😉

Panelloù

.

Un nebeud panelloù am eus graet evit un diskouezadegig divyezhek gant Kejadenn. Klikit warno d’o brasaat mar fell deoc’h. Lod all a zo da zont, sañset, p’am bo amzer hag awen… Ma welit fazi pe fazi, lavarit din, evel just ! Ha ma zo soñjoù ganeoc’h evit panelloù ouzhpenn kement all.

Matezh-moi ça

N’eo ket em befe ezhomm a abeg pe abeg evit tresañ merc’hed koant gant dilhad seksi, met fellout a rae d’ur vignonez ma tresfen un dilhad matezh dezhi (kit da c’houzout perak xD), ha c’hoant ha doa da welet ma c’hellfen ober un dra disheñvel diouzh ar pezh a ran boaz. An dilhad eo a zedenne anezhi, ha kinnig a rae mont war-du an tresadennoù “giz” a vez er c’helaouennoù merc’hed a-wechoù (ale, ale, gouzout a reomp holl e lennit Femina gant ho panne kafe da sul).

Challenge accepted, emezon, ha gwelet neuze ar pezh a vefen gouest da ober gant ma broustoù watercolor war Photoshop. C’hoant am boa da gaout un efed ‘treset’ pe “livet”, kentoc’h eget livet “dre urzhiataer”, ma welit ‘pezh a fell din lavar. Dre ma ‘z ae mat en dro hep an drolinenn zu em eus dalc’het daou zoare. Ha n’on ket evit lavar pehini a gavan ar gwellañ.

Belo, mam belo !

Goulennet zo bet diganin gant ur mignon din tresañ un tamm marc’h-houarn faltazius evit ur c’hoari en ur c’hamp vakañsoù… Siwazh n’em eus ket bet kalz amzer, met graet ‘m eus un draig memestra, petra soñjit anezhañ ? Mont a ra buan a-walc’h ober seurt konerioù propik gant photoshop, memestra xD Desket am eus penaos e veze savet rodoù marc’h-houarn, ivez, dedennus a-walc’h… ^^

(klikidi-klikit a-benn brasaat, mar fell deoc’h)

Glasdebrerien

N’em eus netra a-ene d’ar re na fellfe ket dezho debriñ kig, evit abeg pe abeg, keit ma ne zeuont ket d’am rediañ – re gar on da vlaz ar c’hig, kig ruz dreist-holl. Daoust ma komprenfen ar bras eus an arguzennoù hag an abegoù, ne soñj ket din e vefen gouest d’ober hep ma zamm kig pemdeziek (pe ma zamm pesked, n’on ket re dorr revr :p). Un afer blaz. Ur gaozeadenn hir am boa bet war ar poent se gant mignoned, ha daoust ma ne vefe ket bet cheñchet ma ali (nag o hini) em eus he c’havet dedennus. Ne vutunan ket, ne evan nemet ral a wech e gwirionez (ma, ken ken ral se sizhunvezhioù ‘zo, met a-is d’ar geidenn on a-dra sur), kement hag ober e tibabin an doare ma varvin me ivez, leun a broteinoù hag a louzoù fall, haha ! Bo, ne vo ket graet an tabut amañ, evel am eus lavaret emaon a-du ganto dre vras, daoust ma kendalc’hin-me da zebriñ kig chugus (met ket forzh pe hini, diwall a ran memestra d’ar pezh a brenan).

An deiz all koulskoude e oan e Naoned e-pad un dibenn-sizhun, evit ur stummadur kinniget d’an aozadurioù ha kevredigezhioù-studier. Dedennus bras, met skuizhus ivez, ha da sul kreisteiz, goude bezañ bet da bompiñ-anezhi-up da sadorn da noz (eh, Saturday Night Fever a vez e Naoned ivez, hañ ^^) hag heuliet ar stummañ a-hed ar mintinvezh e oa marnaoniet an holl. Setu ni neuze da vont d’ar sal-debriñ ha…

…tofu, da sul kreisteiz, devez ar c’hig-yar-gant-fritez santel ! Herezi ! Anzav a ran e kavan mat ar meuzioù vejetarian dre-vras, met aze… Urg. Ha koulskoude e oa an hini oc’h ober ar boued unan a-vicher arbennikaet war ar boued veggie ha tout, hañ, ne oa ket forzh petra…

Diskleriañ a ran ar blog tiriad tofu-free neuze, arabat dikoñiñ !

Marvailhoù

Marteze o peus soñj eus WIP ar marc’heg am boa diskouezet amañ ur mare ‘zo… Ma, echu eo an dresadenn 🙂

Klikit war ar skeudenn d’he brasaat 😀

Ur bern traoù am eus desket oc’h ober war-dro homañ, he gwirionez, gant ar sklentenn hag a fed teknikoù Photoshop ivez 🙂

Ur gerig hepken

Ya, disoñjet ‘m eus hetiñ un Nedeleg laouen deoc’h! Gant ar vezh. Ma, gant an tad-Nedeleg em eus bet ur sklentenn c’hrafek vihan (da welet ma plij din labourat gant seurt traoù, kent prenañ unan ‘pro’, a zo ker, memestra ^^), un dresadennig neuze, din da bleustriñ un tammig gant ar benveg nevez se ^^ (cf. an dresadenn ziwezhañ en notenn gent, ivez ^^)

Un dresadennig

O labourat war un nebeud traoù emaon, pa vez amzer ganin…