Aet on

Boñ, n’em eus ket lakaet traoù amañ abaoe un nebeud devezhioù (war-bouez hir a respontoù da Barisot), evit abegoù liesseurt, ha n’hellin ket lakaat kalz a dra kent dilun a-zeu d’an nebeutañ, dre ma ne gasan ket ma urzhiataer ganin da Iwerzhon (n’eus ket plas !). Marteze e kavin unan du-hont ur wech ar mare, da lakaat un nebeud soñjoù ha da gontañ ma buhez (oh-so-dedennus), gwelet ‘vo. E-mod all e tozvin ur mega-notenn pa vin distro, gant luc’hskeudennoù emichañs, deoc’h d’ober goap un tammig eus ar Moran oc’h ober e damm furlukin ^^

D’am soñj e vo mat din mont kuit eus ar Stad brein-mañ (ne gomzan ket eus ma stad din-me, evit ur wech :p), gwelet traoù all, daoust ma vefe pell ar Stad iwerzhonat a vezañ direbech. Ma, cheñch aer un tammig, gwelet tud en-dro ha glebor sklas Galway, mmmmh 🙂 Un dra bennak a zo gant Iwerzhon, n’ouzon ket petra re vat, met disheñvel e vezer pa vezer war an enezenn. Ar Fomoire, marteze, per ar boudiged, n’ouzon ket, met un dra bennak a zo. Ha kêr Dulenn, ivez, ma vez gwelet an Istor, hag an istorioù, warni c’hoazh. Un aergelc’h a zo, unan dibar d’ar re all, ha n’eo ket ouezh e vefe bet kement a skrivagnerien o lakaat Dulenn da dudenn, pe da foñs meurdezus ha lous, d’an nebeutañ. Un dra bennak a zo.

Ma, evel-just ne vo gwir kement-mañ nemet ma teuan a-benn da vont da Naoned, kentañ tra (na rankfe ket bezañ re ziaes memestra, d’ar gwashañ-holl e kavin tud en ur c’hoari biz-meud xD), ha, dreist-holl, ma zo dour-tan gant ar c’harr-nij ha ma vez e lezet da zibradañ. Evel-just eo e Naoned ez eus ar muiañ a gudennoù gant an dour-tan, ha n’ouzon ket re petra eo stad an harzoù-labour en aerborzhioù met boñ… Sell ‘ta, setu ur stourm efedus, stankadennoù a servij d’un dra bennak, hep trenioù, hep kirri-nij, hep dour-tan e vez diaes d’ur vro kenderc’hel da vont, hag e pleg ar gouarnamantoù. Hag aze on prest da vezañ hegaset, peogwir e tegaso un dra-bennak. Hep skolioù-meur… E vo pout ar bobl, ar pezh a fell da Sarko ha d’e vignoned forzh penaos, hervez ar mac’hagnañ a reont eus an deskadurezh. E gwirionez emañ stankerien R2 o sikour ar gouarnamant ! Omd ! :p

Ha dre ma vez nebeutoc’h a dalvoudegezh gant un aotreegezh (pe un diplom all) tapet en un hanter-bloavezhiad kentelioù e vo tu d’ober fae war studierien R2, hag e teuo nebeutoc’h a dud eno (ar pezh a zo bet gelet goude pep stankadenn), da lavaret eo e vo nebeutoc’h a dud o stourm, peogwir e vint e skolioù-meur n’o deus ket spered stourm Roazhon 2 (ar spered a zo mat, hañ, an doare a zo null). A-benn ar fin e vo koll ar stourm, ur wech ouzhpenn. Padal e c’hellfemp bezañ penn-araok ur stourm nevez, ha bodañ an dud, kreñvaat levezon hor spered, gwelaat ar vro, ar gevredigezh hag he c’heodedourien, pe klask, d’an nebeutañ. Met ne vo ket, evel-boaz e vo ‘stankaaaaaañ‘, evel ma huchfe lod all ‘braaaaaaaaains‘. Brein-s, kentoc’h.

Gortoz a ran ivez ar mare (a zeuio buan ma n’eo ket deuet dija) ma c’halvo an AG da vanifestiñ evit an dud dibaper, al lojeiz, Haiti, chase ar balumed hag Hadopi, kement ha meskañ pep-tra ha tanavaat ar stourm, hañ. Pe doare ar spagetti eo marteze, bannañ pep tra ouzh ar gouarnamant ha gwelet ar pezh a beg ? Mat eo stourm evit pe a-enep d’an holl draoù-se, ha ret eo en ober, met pep-tra war an dro ? Ne ra nemet morañ pep stourm en ul latarenn distumm ha diefedus. Unvaniezh ha sklaerded, n’eus nemet e-giz-se e ya en-dro, pep stourm d’e dro, efedusoc’h e vezer pa vezer holl gant an hevelep pal. Divide et impera, pa lavaran deoc’h, seul vuioc’h a balioù disheñvel seul ziaesoc’h. Evel-just eo teorikel, met n’eus nemet sellet eus ar stourmoù diwezhañ, hañ, pouf-pouf c’hwitet pep-tra. Gouarnamant Sarko n’eo ket evel hini Chichi, ha kentoc’h eget c’hoari pom-pom-girl dirak ar savadur B e vefe mat paouez gant ar chichioù (see what I did there?) ha bezañ efedus. Mod all e c’heller chom da stankañ betek hor 65 bloaz (67 ? :p), ivez, hañ, kement hag ober, ne vo ket efedusoc’h.

Kroget evel m’emañ e vo stanket ar skol-veur betek ar vakañsoù forzh penaos (d.l.e. e yelo an holl studierien d’ar gêr hiziv goude ar vanif’ ^^, pe pa vo trenioù adarre :p). Ha me o soñjal e c’hwitfen kentelioù gant an tamm beaj-mañ, ahaha, pegen buoc’hig ^^ N’eo ket gwall strik, gant ma vo ur skol-veur c’hoazh pa zistroin, ha gant ma ne vo ket bet re a zistruj (bah ya, distruj hag graffiti-añ an añfioù a zo ken efedus, hag a dorr kement revr ar gouarnamant, wou-c’hoù ! Ha kement hag ober e vefe mat distruj an taolioù hag ar c’hadorioù ivez, hag ar prenistri, evel boaz, hag ar mekanig sncf ivez, Sarko n’hello ket prenañ e vilhed er skol-veur, na pegen añmerdet e vo ! /goap). N’ouzon ket perak ez eus kasoni ouzh ar Skol-Veur gant lod studierien, soñjal a rae din e felle deomp he difenn, un nebeud bloavezhioù ‘zo ?

Ma, ne vin ket aze da respont neuze n’eo ket dav tagañ ac’hanon en evezhiadennoù 😉 Pe ket diouzhtu d’an nebeutañ. Ma, pe grit ha tabutit etrezoc’h :p Me a vo oc’h evañ Guinness, sañset, hag o kaout un tammig craic a-raok distreiñ d’ar vro. Pe marteze e vo stanket an holl aerborzhioù hag e vo ret din chom da evañ Guinness pelloc’h, nag ur vezh e vefe !

Bezit fur, da c’hortoz (emañ Nedeleg o tostaat ! 😉 )

All the loney people…

Ma, distanket ar skol-veur, buan eo bet xD Marteze e vo stanket adarre a-benn nebeut, piv ‘oar… Gwelet ‘vo.

Meh, kousket ‘m eus 12 eurvezh an noz-mañ ha re skuizh on evit soñjal. Iskis eo bet ar veaj-tren; dre ma oa ret din bezañ e Kemper abred a walc’h da wener ha ne oan ket re sur eus an trenioù a vefe, gant an harz-labour hag all, setu on aet d’an ti-gar da welet, hag en em gavet on en un TER ne oa ket embannet war ar baperenn, nag en tiez-gar ma erruemp enno, kennebeut… Hag erru un tammig goude Redon o deus ouzhpennet ur 7 harz bennak d’ar veaj… Santez-Anna, Landaol-Mendon hag all oO Daou dren a oa stok-ha-stok, ha re hir e oa evit tiez-gar ‘zo, kement ma c’houlennent d’an dud a felle dezho diskenn eno mont d’an tren-raok, rak ne oa ket hir a-walc’h ar c’hae xD Alala, hag evel-just, dre m’eo ral an trenioù e oa leun-kouch ! Dre eurvat e oa leun a-walc’h ma sac’h din da vezañ gouest da azezañ war e c’horre…

Hag ur vaouez kozhik a-walc’h a oa aze, e-kreizig-kreiz al lodenn ma oa an holl dud war-sav enni, gant he labous en ur gaoued, o komz, o komz hag o komz ! Ma doue, biskoazh gwashoc’h flaperez. Ha gant forzh piv diwar benn forzh petra, ivez. Gouzout a reomp holl pep-tra diwar-benn he buhez, bremañ, hañ. Lâret e vije bet unan eus an dud vev er metro a fell dezho kontañ o buhez deoc’h, hag a oar ez oc’h dedennet meurbet. Unan eus ar merc’hed e-tal dezhi a oa studierez, da vezañ skoazellerez-sokial (evel merc’h henañ ar flaperez, a zo bet en hevelep skol hag hi, e-pad 3 bloaz, hag a zo o labourat er skolioù ivez bremañ xD); d’am soñj emañ partiet mat, o welet pegen sioul ha degemerus e chome, ha pegement a basianted he doa :p N’eo ket e vefe bet direnkus da vat ar vaouez, met boñ… Goude ur mare on en em gavet en he c’hichen war an bank, aze, ha me gant Les Fleurs du Mal, ha setu ma stou he fenn ha ma krog da lenn ganin xD Tost echu e oa al levr ganin, ha pa ‘z on aet d’e renkañ, peurechuet he deus lavaret din “Oh, domaj eo, o lenn dreist ho skoaz e oan!” oO Ma, ganti emañ al levr er gêr, n’eo ket strik. Hag ur varzhoneg a lenn ur wech an amzer. Hahaha, flaperez, me lavar deoc’h ! Ha gant an harzoù ouzhpenn a veze lakaet ne oa ket embannet ar re vat gant an destenn-fiñv a zo a-us d’an norioù en tren, ha penfollet e oa-hi bewech, hag o vont a brenetr da brenetr da c’houzout e peseurt ti-gar e oamp erru (padal e veze embannet gant blenierez an tren ^^)… Un abadenn.

Alala, diskennet eo en Oriant siwazh, hiroc’h eo bet peurrest ar veaj hepti 😉

Haha !

C-c-c-c-combo !

Trugarez dit, Chen, tizhet ar pal fenoz a-drugarez dit 😀 Ha trugarez d’an holl lennerien ivez, ha d’ar re a lez un evezhiadenn ur wech ar mare 😉 Daou c’hant notenn, memestra. Ma, traoù mat ha traoù fall, traoù dedennus (spi ‘m eus !) ha traoù ne oant ket (pe ket kement :D), traoù hir ha traoù berr, traoù laouenoc’h (ah ?) ha traoù digalonekaus (ya, dreist-holl :p), kalzig traoù a zo bet memestra ! Ha chom a ra traoù am boa lavaret a rafen ha n’em eus ket bet tro da ober c’hoazh… A vezo graet en dazont ! N’ouzen ket re vat ma talc’hfen gwall bell gant ar blog-mañ, hogen talvezout a ra ar boan, d’am soñj, evit ar blijadur da lenn hoc’h evezhiadennoù tra ken ! Hag evit gellout paboriñ gant notennoù evel homañ, ivez :p

Traoù zo o deus cheñchet em buhez abaoe m’am eus bet roget d’e skrivañ, ivez, daoust m’eo bet un doare da bareañ aboae ar penn-kentañ anezhañ, ha m kendalc’h da vezañ. Iskisat tra e vefen bet dic’houest da zerc’hel da skrivañ pa oan em fallañ un nebeud sizhunvezhioù ‘zo. Chal ha dichal n awen hag ar c’hoant, emichañs. Ma, sklaeroc’h ar c’houmoul bremañ, sklaeroc’h ivez sked an heol, ha daoust m’o defe touet doueed an Etrerouedad hegasiñ ac’hanon betek penn e tlefemp en em dennañ ! Ur banne stlennsistr a brofan d’an holl, ha chom a ra cheesecake evit ar re a fell dezho, aze, war an daol. N’eus ket whisky ken, siwazh ^^

Trugarez deoc’h ur wezh ouzhpenn, tudoù, ha gant ma kendalc’ho an niveroù-se da vont war gresk; ul levrig a vil pajennad n’eo ket c’hoazh 😉

C’hoari gant ar sonioù ? Me ?

Kamm-digamm e ya ar c’hamm gant e samm;
Gant ar mavigamm, poan d’an dister bramm.
Mamm ganti dinamm he zamm sae ruz flamm;
D’ar pevarlamm e telamm, e vazh kamm
O ruzañ, kozh tra, a rankfed berzañ
Bezañ m’he laka da gouezhañ ! “Sell ‘ta !
Aneval amparfall !” Daoust ma n’eo dall,
Gant ar mall, ‘vel gwezhall, e teu ar gwall !
Diwall, an taol all, ken ma vezo fall
An disoc’h. Ha gwasoc’h c’hoazh eo dasoc’h
Loc’h diroc’h, sav kloc’h ar c’hozh hoc’h kalloc’h
P’en em gav-hi, graet patati ganti,
War beg he fri, ha noazh hec’h izili !

Evit ar c’heekezig ;)

N’eo ket bet graet ganin, met soñjet ‘m eus e kavfe se farsus ^^ Kit d’he blog da gompren perak :p

Skol-Veur, ma Skol-Veur…

Oh bah, sell ‘ta, stanket ar Skol-Veur ! Obadidoñ, pebezh souezhadenn !… Ma, evit ur mintinvezh hepken evit poent, ha n’eo ket sur c’hoazh e teufent a-benn, o welet emañ ar surentez aze bep mintin abaoe dilun, hogen ur wech kroget an traoù ‘giz-se… Opala, ma vez stanket a-raok ar vakañsoù e vo marv ar c’hwec’hmiziad, dre ma adkrogo 10 gwech kreñvoc’h goude an Hollsent. Ma, erru e master n’eo ket pouezus, lakaomp, lezet e vezer da dremen peurliesañ, met n’eo ket gwall blijus kennebeut, evit ar gelennerien traken. Ya, ret eo stourm a-enep d’al lezennoù-se ha d’ar gouarnamant, ya, n’eo ket reizh ar raktres kinniget, ya. Met stankañ ar Skol-Veur ? Hag he distruj, dreist-holl, evel ma vez bep bloaz ? Ne welan ket mat ar pezh a zigas. Foutu pour foutu, emezo… Koulz kaout vakañsoù, evit gellout Stourm (oh ya, ur bennlizherenn). Brastresañ a ran, evel just.

Pa soñjer, memestra, erru e master 2 n’eus bet anavezet nemet 1 bloavezh didrabas ganin, hag e Galway e oa … Ar bloavezh-se ne oa bet netra e Roazhon kennebeut, hañ, o c’hortoz ac’hanon e oant ! >_< fmb (fouzh ma buhez :p) Pa soñjer e oa deuet un 2000 studier nevez ouzhpenn ar bloaz-mañ hag e oa spi gant ar gelennerien e kreskfe Roazhon 2 en-dro goude an digresk spontus en abeg d’an harzoù-labour ha d’ar stankañ… Lod a zo o leñvañ druz, me lavar deoc’h. Afi, boaz eo ar paotr Gontard, ar prezidant, bremañ, ha sur a-walc’h ne lezo ket ar studierien d’ober o reuz, pe ne vo ket aes dezho, atav.

Evel bewech e gwirionez ez on a du gant ar soñj, ar meno, met ket gant an doare. Evel a lavare Morwenna din hiziv, n’eo ket reizh meizad an emvodoù-meur, re nebeut a studierien a vez eno ha direizh ar votadegoù peurliesañ. Hag an doare nemetañ da vont a-enep dezho a zo dont da votiñ a-enep ar stankañ hag all, da lavaret eo reiñ boued d’ar sistem hag e gadarnaat ! Etre ar fall hag ar gwashañ…

Wait and see, met diaes e vo fin ar c’hwec’hmiziad d’am soñj… Ha mall zo warnon bezañ e Galway evit un nebeud devezhioù da aveliñ ma fenn, ivez (ha labourat, un tammig ^^). Plijus e vo.

Interwebz, fuck yeah!

Oh, traoù ‘zo a zo re vat, kaaalz re vat da chom hep bezañ lakaet amañ xD

Evel just e c’heller ober lod e brezhoneg ivez, hañ, daoust ma vefe farsusoc’h ar meme-où e saozneg peurliesañ 😉

Boh, ya, aes eo ^^ Met soñjet ‘m eus e c’hellfen ober un tamm notenn bennak hep klemm, evit ur wech (daoust ma vefe diaes, bremañ ma ‘z eus bet komz eus Emglev Brein, hahaha), peogwir ne ya ket ar bed ken fall se, e gwirionez. Ya, kudennoù zo e pep lec’h, gant an holl, evit an dazont, evit ar yezh, war ar pemdez hag en ideologiezhioù a vez taolet deomp, met daout ha ken pouezus-se eo ? Pa oamp, un nebeud mignoned, brezhonegerien, o farsal ha pakañ banneoù, ne oa ket gwall bouezus ar bed en diavaez, ha gellout a raemp c’hoarzhin a bep-tra. Mareoù zo ‘giz ar re-se, ha pa vefemp gant un enkadenn ha ma vefe teñval ar c’houmoul war dremmwel hon dazont, paour-kaezh studierien ma ‘z omp c’hoazh (opala, trouz a oa en AG hiziv…), bez zo mareoù ‘giz-se ma ne reer ket van.

N’eo ket du pep-tra, dre eurvat, hag e-kreiz an noz e vez ur sklerijenn bepred. Na !

Blogerien…

“Just as it is true that a stream cannot rise above its source,
so it is true that a national literature cannot rise above the moral level
of the social conditions of the people from whom it derives its inspiration.”

(James Connolly, [of Easter Rising fame])

Mmmh, n’ouzon ket re ma ‘z on ali gant ar paotr Connolly, pe neuze, ma n’hell ket mon a-us, ne heul ket al lennegezh ar c’hemmoù kevredigezhel dre ret kennebeut, hag e brezhoneg siwazh n’eo ket ber uhelaet live al lennegezh gant uheladur al live sokial… Ket en 10 bloavezh diwezhañ d’an nebeutañ. Daoust ha nevezet e vo bremañ ma vez un enkadenn-armerzh en-dro ? Mareoù frouezhus evit al lennegezh e vez ar mareoù gwashañ peurliesañ. Marteze e vo ul lennegezh post-Kerviel er vro Vigoudenn, piv ‘oar!

Ma, etre an Internet ne ya en-dro nemet ur wezh diwar ziv (eh ya, “ur wezh war ziv” a vefe iskis, ne welan ket penaos e pignfe ar wezh-se aze), ar redek a-gleiz hag a-zehou hag an dud pedet d’ar gêr da bakout ur banne ha da gomz, ne zeuan ket mat a-benn da skrivañ ma zamm skrid pemdeziek! N’eo ket diouer a draoù a zo da lavar koulskoude, pe soñjoù da lakaat war baper (pe stlennbaper pe me-oar-me). War a seblant ez eus bet graet berzh gant ar gaozeadennig diwar-benn al lennegezh un nebeud devezhioù ‘zo (d’am soñj eo an notenn gant ar muiañ a evezhiadennoù warni betek-henn ^^), ar pezh a zo kalonekaus en ur mod, prest e vezomp da gomz etrezomp 🙂 Hag an daou du a vez er gaoz un tammig, pe an tri: lennerein, embannerien, skrivagnerien (lod ac’hanomp o vezañ an tri war an dro !). Oc’h ober goap e oa Roparz o kinnig en em gavout e Karaez a-benn ober kaol-go mod Gutenberg, met hep dekoñiñ e c’hellfe bezañ dedennus aozañ tabutoù pe divizoù war an dodenn. Da welet evit an dazont marteze, pa vo bet savet ur c’hlub meizerien, “intelektualed”, ganeomp :p

Hag o komz eus plas ar brezhoneg war an Etrerouedad e oan neuze, er fin, ha Chen o c’houlenn ivez e pelec’h e oa lennerien ar blogoù e brezhoneg ! Re wir, daoust ma vefe disheñvel pal ur blog diouzh hini ul lec’hienn-ditouriñ marteze, personeloc’h. Ma, gwir eo ne vez ket kalz tud (ha c’hoazh, ha c’hoazh…), hogen daoust ha brudet e vez ar blogoù a zalc’homp ? Ket brud vat pe fall, hañ, daoust ha gouzout a ra an dud ez eus anezho ? War-bouez an dud hon anavez, evel-just… N’ouzon ket re. Bet on meur a-wech o klask lec’hiennoù e brezhoneg, gant forzh gerioù-alc’hwezh, ha buan en em gaver gant ul listenn verr-verr, siwazh. Ha diaes kavout roud eus ar blogoù a anavezan (pe ma hini, daoust din gouzout petra klask d’e gavout: nolwenn korbell en noazh, kalc’hoù ‘barzh revrioù… >_<). Marteze ne vefe ket fall lavar d’ar vrezhonegerien yaouank ez eus anezho, n’ouzon ket penaos re vat, avat, listennadoù amañ hag aze, keleier ? N’ouzon ket  penaos o zizout… Hag aze emañ an dalc’h ivez, penaos e c’heller brudañ traoù a-seurt-se d’ar re yaouank ma ne vez ket graet gant ar gelennerien? Ne lennont na Bremañ na Ya (haha, piv a ra ?), nag Al Liamm kennebeut, evel-just; ne soñj ket din e vefe taolet an disterañ sell war Kannadig Diwan pe traoù a-seurt-se ganto kennebeut. Petra ‘chom neuze ? evel a lavaran, n’eo ket ken aes-se d’an nen kavout lec’hiennoù e brezhoneg drezhañ e-unan…

Hag a re a vez kavet a-wechoù, ma Doue benniget, leun e revr a doulloù preñved… Lec’hiennoù eus ar bloavezhioù 50, pa ne oa ket eus an Etrerouedad c’hoazh! Haha, geocities, pebezh lamm en amzer… Ha n’eo ket un amzer gwelloc’h eget hemañ ^^ Hiziv an deiz eo aesoc’h ober lec’hiennoù propik koulskoude, hep kaout da zeskiñ html, pe php, pe me-oar-me petra. Savennoù evel WordPress, just a-walc’h, pe Joomla pe n’ouzon ket pet all c’hoazh a c’hell bezañ implijet da ober traoù a-zoare e berr(oc’h) amzer, ha koulskoude en em gavomp c’haozh gant lec’hiennoù re gozh. Boñ, kavet am eus bet blogoù all ivez, darn vrasañ anezho diwar-benn ar relijion >_< Traoù zo ne varvont ket, daoust ma vefe pase poent dezho… Boh, dieub pep hini, hañ, ne ra ket a zroug din, lakaomp; hogen souezhus e kavan e vefe roudoù c’hoazh eus ar c’hliché-se war an Internet, brezhoneg=relijion, daoust ma vefe ar gwiad unan eus luskerien ar vodernelezh… Mmmh… Ma, n’eo ket an afer amañ forzh penaos… An afer o vezañ kentoc’h en em c’houlenn penaos brudañ hon tammig skridoù amañ hag aze, da dizhout an nebeud a dud a vefe dedennet ! Gwir eo e c’hell bezañ diaes derc’hel da skrivañ traoù pa n’ouzer ket re vat ma vezer lennet, digenvezded ar bloger dirak e stlennbajenn-wenn !

Gant ar spi memestra e vo muioc’h-mui a dud ken sot ha ni !

 

p.s.: Lec’hiennoù brav a vez graet memestra, daoust ma vefe resis o zodenn peuliesañ; ar bannieloù pe an douaroniezh da skouer… Lod all a anavezit ?

Dazont

Kizellet a daolioù taer e greunvaen kozh da goustiañs
Delwennoù o zresoù kaer e roc’h didro da fiziañs
Ar re ac’h eus savet din, daoust ma vefe follentezh
Krediñ ken kreñv e c’hellin sammañ pouez da hêrelezh

Na den all ebet moarvat, ken meurdezus ez out bet,
Ne vez ket gwall aes avat kaout soñj eus an tremenet
Pa vezer o stouañ penn, saotret c’hoazh er poulloù du
Pa vez war lufr ar feur gwenn hini fank glas gwenn ha ruz

Ohoho

Sellit ‘ta eus ar pezh a zo erruet er gêr dre ar post hag a oa ouzh ma gortoz pa’z on distroet fenoz:

Gwashoc’h abeg da vont d’ober un dro da Iwerzhon adarre a zo, n’eus ket? 😀

Mmmmh ? Penaos ? Ne lennit ket iwerzhoneg ? Alala, ar yaouankizoù a hiziv, penaos emaoc’h e soñj dreistvevañ er bed a vremañ hep gouzout komz iwerzhoneg, hañ ? Yezh an dazont eo, memestra ! Yezh an armerzh hag ar studi, ul lingua franca nevez ^^ Boñ, setu neuze an droidigezh er yezh peuzvarv-se a gomprenit, pfff:

Boñ, n’ouzon ket re ma’z on guest hepken pe betra, da lavaret eo ma ‘z on sañset resevout ma Diplóma sa Gaeilge pe dont da welet ar re all hepken, da lavaret eo ivez ma rankan bezañ gwisket kran (evit ar re all) pe hollcheuc’h (gant an tog hag ar sae ha tout :p) evit resevout an tamm paperenn :p Ret e vo din ober ma zammig enklask 😀

Haha, met m’eo ret din gwiskañ gant pep tra e c’hellit bezañ sur e vo luc’hskeudennoù amañ xD

Happiness+apples= happles

Red, herr, noz ha deiz,
Red davet ar garantez
Kred, kerzh, lamm ha kouezh,
Kred e vo bravoc’h bemdez

Ped, leñv, war an tre,
Ped evit ma adsavfe,
Bred, soñj, koun, hunvre
Bred ennañ holl da vuhez

Hed, led, eleze
Hed-ha-hed da ved nevez
Led, strew, plant aze
Led hadoù hag e po gwez

Pled, sioul, adarre
Pled c’hoazh gant an diazez
Pred, pell, hir vare
Pred, ar preder en e zle

Med, drant, dizale
Med frouezh ruz al levenez
Red, kerzh, pe bale
Redek a ray ganit-te

Ya, evel-just e tistagan /de/ evit deiz, pe /neve/, hag all 😉 Anzav a ran e teu diaes kavout gerioù berr e -ed a-benn kenderc’hel xD

Ul Lennegezh kreñv ?

Kaozeadennoù ‘zo a zo dedennusoc’h eget lod all, na pegen berr e vefent, ha laouen on o welet ez eus tud all c’hoazh a zo a-du ganin (pe ganeomp, lennerien gaezh ^^) diwar-benn dazont ar brezhoneg, pe e ziouer a zazont ma chom an traoù evel ma’z int. An hevelep kaoz bepred, sur a-walc’h, enebadur ar re gozh hag ar re yaouank, an hen hag an arnevez, traoù zo ne cheñchont ket, e forzh pe vare. Hogen hiziv, e bedig ar brezhoneg, n’eo ket ‘vel da vare Boileau ha Perrault, La Bruyère ha Fontenelle.

Kentañ tra, a zo anat marteze, met a vez disoñjet alies, c’hoantek pe get, un diforc’h bras a zo a-fed skeul. Eus an nebeud miliadoù a dud a oar komz brezhoneg (ha n’eo ket sur e rafent), n’int ket holl dedennet gant ar yezh, n’int ket holl ‘stourmerien’, ma fell deoc’h, daoust ma ne blijfe ket ar ger din (stourmer ma revr, neketa), nebeud anezho a zo prest da gemer perzh da vat, emvodoù, divizoù, skrivañ, ober. Ha reizh eo, sur a-walc’h emañ izel an dregantad e forzh pe kevredigezh, met gant un niver ken bihan hag hon hini en em gaver buan gant un diouer a dud. Gwelet a reer mat e chom an hevelep re (tud pe familhoù) e penn an traoù, for better or for worse. Ha n’eus ket kalz tud o vountañ a-dreñv, siwazh, fae ma’z eo ma remziad marteze, ha pell eus an ‘emsav‘. An dra-se am eus bet lavaret dija.

Eil tra er paour-kaezh keñveriadenn-mañ, n’eus tamm preder ebet el lennegezh e Breizh, pe hogos tamm, d’an nebeutañ. Rouez eo al lennerien, dizedennet ar re yaouank dre-vras (ha goulennit digant forzh peseurt kelenner, gwelet a reoc’h buan), dreist-holl pa ne vez kinniget netra dezho. Pe netra na blijfe, atav, netra talvoudus, mar karit (ya, ya, klask a rin skrivañ ul levr talvoudus evit priz ar yaouankiz, ma ne vezan ket pulluc’het gant Stefan da gentañ >_<). N’eus preder ebet war ar pal, neuze, war ar re a lenn, fellout a ra deomp (pe dezho, kentoc’h) krouiñ ul lennegezh uhel en ur zisoñjal ne vo den d’he lenn ma ne reer netra bremañ ! Gellout a ran kompren, hag a-du on en ur mod, ret eo sevel skridoù bras, talvoudus evit ar yezh, met arabat disoñjal al lennerien ! Lavaret e vije emañ lod tud sparlet en o zourioù uhel, hep soñjal sellet dre doull ar prenestr ha parañ o selloù war an dud vunut. Trist eo.

Trede tra, a ya da heul an eil, n’eus preder ebet a-berzh ar skrivagnerien o-unan diwar-benn ar pezh a reont. Neus ket ur skol vreizhek, emañ pep hini en e gorn, awenet e vezer gant skrivagnerien saoz, gall, rusat, amerikan ha me-oar-me, evel pa vefe anzavet gant ar skrivagnerien o-unan n’eus netra da dennañ eus lennegezh Breizh. Pelec’h emañ hon Joyce, hon DeLillo, Camus, Coetzee, Beckett, Asimov, Orwell ? Piv a zo bet kreñv a-walc’h e levezon evit ma vefe komzet eus lennegezh post-e anv? Roparzh Hemon, pe Gwalarn dre-vras? Hag abaoe? Evel-just, ne c’hell ket forzh piv bezañ ur burzhud lennegel, hag emichañs e klask an holl skrivagnerien ober o seizh gwellañ (ha me ivez), met n’eus soñj ebet, mennozh pe bal ebet, hag an dra-se a rebechan d’al lennegezh e Breizh dre vras: kontañ istorioù a ouzer ober, hêrezh al lennegezh dre gomz emichañs, ya, kontañ a ouzer ober, hogen soñjal ne reer ket kement-se ken (lod a ra, evel just, n’eo ket gwenn pe zu pep tra), soñjal ha prederiañ war stad ar gevredigezh, al liammoù hag ar stourm etre yezhoù, pobloù, ar bed –ha Breizh– o cheñch, da skouer, a raer nebeut-nebeut, kreizennet ma ‘z omp war yann-dudenn. Ha c’hoazh, ur mare ‘zo bet e oa eus ar preder se, plas an den e kêr, da skouer, ar c’holl. Met hiziv an deiz…

Ken bras eo an diforc’h pa geñverian gant ar pezh a studian eus lennegezh Iwerzhon ! Hag en iwerzhoneg ivez, hañ, abaoe pell. N’eus ket kant tra da ober, d’am soñj e ranko an traoù cheñch tamm ha tamm, ha spi am eus e vo skrivagnerien nevez, yaouank pe yaouank o soñjoù, o tontn ha ne vint ket kaset da sutal gant bed an embann.

DeLillo

Red an amzer

Mmmh? Netra da welet gant an abadenn, nann ^^ Red an amzer, hepken, ha pegen herr pe c’horrek e c’hell bezañ, evel ma oar an holl. Hiziv a zo bet un devezh hir, ar pezh n’eo ket fall dre ret; plijus eo bourrañ e leziregezh an dibenn-sizhun. Dec’h, avat, a oa disheñvel, hag an nebeud eurvezhioù se a zo tremenet buan, ken buan. Re vuan marteze, ha c’hoazh, n’ouzon ket, adkas a ra soñj din eus traoù all, prantadoù all hag eurvezhioù er pellgomz.

Ha koulskoude n’eus ket bet graet kalz a dra, soñjal a rae din e oa gorrek ar red d’ar mare-se. Pe un afer plijadur e vefe hepken. Pegen buan e c’hell an eurvezhioù tremen, zoken pa ne veze graet netra…

Bremañ e plij deomp muzuliañ an amzer, gouzout bepred pet eur eo, pegeit a zo tremenet, kentoc’h eget bevañ, ken aes ha tra, ha soñjal e oa re verr ar mareoù-se, daoust ma oant hir ez-skiantel.

N’ouzon ket re vat ar pezh a fell din lavar. Trugarez, sur a-walc’h

Kuzh-heol

Pennoberenn da galon noazh, ar mac’hagner
Da spered gwan bremañ, ijin gagn, skrivagner
E voger en e boull dre gadoù an talmer
Noaz en e noazh, an didrec’husañ batalmer
A sko outañ kement si, kement fall bet graet,
An disterañ keuz ha neb fallabeg roet
Hêrezh dister ar glac’harioù o vont da gozh
Klemmgan kriz ha taer da heol o vont da guzh
Ouzh da lezel hollwisket en daeloù yen-noz
A dres war da zremm sklas an hentoù didro n’az
Peus biskoazh gallet heuliañ tre betek o fenn;
Nag ober hanter-dro, daoust d’az pazioù difonn,
Pa weles ne oa netra da gavout warno
War-bouez pouez selloù garv ar re a varnas
Da dorfedoù hunet, pec’hedoù hunvreet
Ar re n’hallez anzav bezañ o rambreet